უკრაინის პარლამენტმა 8 მაისს დაამტკიცა კანონპროექტი, რომელიც ზოგიერთი კატეგორიის პატიმრებს შეიარაღებულ ძალებში სამსახურის საშუალებას მისცემს. ვერხოვნა რადამ მეორე წაკითხვით მიიღო კანონი. ახლა მას ხელი უნდა მოაწეროს უკრაინის პრეზიდენტმა ვოლოდიმირ ზელენსკიმ, რომელიც მხარს უჭერს კანონს. რუსეთის ციხეებში სასჯელის გაუქმების სანაცვლოდ მოახდინეს პატიმრების რეკრუტირება უკრაინაში საბრძოლო მოქმედებებში მათ გამოსაყენებლად. სხვადასხვა ცნობით, ბრძოლის ველიდან დაბრუნებული ყოფილი პატიმრები შიშის ზარს სცემდნენ რუსეთის რეგიონულ ქალაქებს, იყო მძიმე დანაშაულების შემთხვევები. ასევე ნახეთ რუსეთმა უარყო უკრაინის ბრალდება, რომ ის ზელენსკის ლიკვიდაციას გეგმავდა ზელენსკის პარტიის თავმჯდომარემ, ოლენა შულიაკმა ფეისბუკში დაწერა, რომ „გაწვევის შესახებ კანონი გარკვეული კატეგორიების პატიმრებს, რომლებიც სურვილს გამოთქვამენ, დაიცვან საკუთარი ქვეყანა, საშუალებას აძლევს, გაწევრიანდენ შეიარაღებულ ძალებში.“ მისი თქმით, ჯარში სამსახური ნებაყოფლობითი იქნება. ზოგიერთი პატიმარი გამოირიცხება, მაგალითად, ისინი, რომლებიც სასჯელს იხდიან უკრაინის ეროვნული უსაფრთხოების საფუძვლების წინააღმდეგ დანაშაულისთვის, ორი ან მეტი ადამიანის განზრახ მკვლელობისთვის, სექსუალური ძალადობისთვის, სამართალდამცველის მკვლელობის მცდელობისთვის და განსაკუთრებით სერიოზული კორუფციისთვის. რუსეთის აგრესიის წინააღმდეგ ორ წელზე მეტი ხნის განმავლობაში ბრძოლის პირობებში უკრაინის არმია ცოცხალი ძალის ნაკლებობას განიცდის. აპრილში ვერხოვნა რადამ მიიღო კანონი მობილიზაციის შესახებ, რომელიც ჯარების რაოდენობის გაზრდას ისახავს მიზნად. ...