პოლონეთის პროკურატურა შპიონაჟში ადანაშაულებს ბელარუსში გაქცეულ მოსამართლე ტომაშ შმიდტს. გასულ ღამით, პოლონეთის იუსტიციის მინისტრმა ადამ ბოდნარმა სოციალურ ქსელ X-ში, თავის ოფიციალურ გვერდზე დაწერა, რომ პროკურატურამ უმაღლესი ადმინისტრაციული სასამართლოს დისციპლინურ ორგანოს მიმართა დადგენილებისთვის, რომლის საფუძველზეც შმიდტს შპიონაჟისთვის სისხლისსამართლებრივი პასუხისმგებლობა დაეკისრება. პროკურატურა ითხოვს შმიდტის დაკავების ორდერსაც. პოლონეთის იუსტიციის მინისტრს არ დაუკონკრეტებია, რომელი ქვეყნის სასარგებლოდ ჯაშუშობა ედება ბრალად მოსამართლეს, რომელმაც თავშესაფარი ბელარუსში ითხოვა. ვარშავის ადმინისტრაციულ საქმეთა სასამართლოს მოსამართლემ ტომაშ შმიდტმა 6 მაისს მინსკში გამართა პრესკონფერენცია და განაცხადა, რომ პოლონეთიდან გაიქცა პოლიტიკურად მოტივირებული დევნის გამო. შმიდტმა თქვა, რომ უსამართლოდ მიიჩნევს ბელარუსისა და რუსეთის მიმართ პოლონეთის პოლიტიკას. პოლონეთის ხელისუფლება რუსეთთან ომში მყოფი უკრაინის ერთ-ერთი ყველაზე აქტიური მხარდამჭერია. პოლონეთის პრემიერ-მინისტრმა დონალდ ტუსკმა მოსამართლე შმიდტის ბელარუსში გაქცევის გამო 7 მაისს საგანგებო თათბირი გამართა სპეცსამსახურების ხელმძღვანელებთან და რუსეთის და ბელარუსის სპეცსამსახურების გავლენის გამოძიების გაძლიერება დაავალა. ასევე ნახეთ ევროპარლამენტს არჩევნების წინ რუსეთის ჯაშუშურ ქსელთან უწევს საქმის დაჭერა ტომაშ შმიდტს მოსამართლის იმუნიტეტი ჩამოართვეს. პრემიერ-მინისტრ ტუსკის განცხადებით, შმიდტი წლების განმავლობაში ღიად გამოხატავდა თავის ულტრამემარჯვენე შეხედულებებს. ტუსკმა პოლონეთის წინა, „სამართლის და სამართლიანობის პარტიის“ მთავრობა გააკრიტიკა იმის გამო, რომ თანამდებობებს იკავებდნენ არაკომპეტენტური და ანგაჟირებული პირები. ხვალ, 10 მაისს, პოლონეთის პრემიერ-მინისტრი გამართავს მორიგ შეხვედრას, რომელზეც ქვეყნის უსაფრთხოების მდგომარეობა განიხილება. ...