უკრაინის უსაფრთხოების სამსახურში დაადასტურეს დრონებით შეტევა რუსეთის კრასნოდარის მხარის ქალაქ ანაპასთან მდებარე ნავთობის ბაზებზე. უკრაინული უპილოტო საფრენი აპარატებით შეტევის და რამდენიმე რეზერვუარის დაზიანების შესახებ გამთენიისას განაცხადა ანაპის ოპერატიულმა შტაბმა. გამოცემა „უკრაინსკა პრავდა“ და ბრიტანული BBC-ს უკრაინული სამსახური უსაფრთხოების სამსახურის ინფორმირებულ წყაროებზე დაყრდნობით წერენ, რომ დრონებით დაარტყეს ანაპასთან მდებარე სოფელ იუროვკაში მდებარე ნავთობის ორ ბაზას. წყაროების თანახმად, ამ ბაზებიდან საწვავის გადატვირთვა ხდება ყირიმში მყოფი რუსი სამხედროებისთვის. უკრაინის უსაფრთხოების სამსახურში აცხადებენ, რომ მომავალშიც გააგრძელებენ შემცირებას რუსეთის ეკონომიკური და ლოგისტიკური პოტენციალის, რომელიც ომისთვის სჭირდება 9 მაისს, დღისით, უპილოტო საფრენი აპარატებით შეტევა იყო რუსეთის ბაშკირეთის რესპუბლიკის ქალაქ სალავატში, ნავთობგადამამუშავებელ საწარმო „გაზპრომ ნეფტეხიმზე". „უკრაინსკა პრავდას“ და BBC-ს უკრაინის უსაფრთხოების სამსახურში განუცხადეს, რომ ესეც მათი ოპერაცია იყო და საწარმოს დაარტყეს დრონით, რომელმაც „ისტორიული რეკორდი" დაამყარა და 1500 კილომეტრის მანძილი დაძლია. ასევე ნახეთ უკრაინული მხარე ადასტურებს რუსეთის ორ ნავთობგადამამუშავებელ ქარხანაზე შეტევას 2024 წლის დასაწყისიდან რუსეთის სხვადასხვა რეგიონში უპილოტო საფრენი აპარატებით შეტევა იყო რამდენიმე ათეულ ნავთობის ბაზასა და ნავთობგადამამუშავებელ ქარხანაზე. არაერთმა მედიასაშუალებამ უკრაინის უსაფრთხოების სამსახურის ანონიმ წარმომადგენლებზე დაყრდნობით არაერთხელ დაწერა, რომ მიმდინარეობს რუსეთის ეკონომიკური პოტენციალის შესამცირებლად დეტალურად გაწერილი სტრატეგიის რეალიზება და უკრაინის ამოცანაა, მოწინააღმდეგეს წაართვას შემოსავალი და რესურსები, რომლებსაც ომის და უკრაინის მოქალაქეების მკვლელობისთვის იყენებს. ...