სვენ გიგოლდი 7-8 მაისს ბიზნესდელეგაციასთან ერთად იმყოფებოდა საქართველოში. ვიზიტის შეჯამებისას ის აღნიშნავს, რომ ევროკავშირში გაწევრიანებაზე მოლაპარაკებების დასაწყებად გადაწყვეტილება ჯერ კიდევ დამოკიდებულია პირობებზე. "გაწევრიანების პროცესი საფრთხეშია", - აცხადებს გიგოლდი. გერმანელი სახელმწიფო მდივანი ჩამოთვლის გამოწვევებს: "ეროვნული ბანკის დამოუკიდებლობის მიმართ მზარდი ეჭვები სერიოზული შეშფოთების მიზეზს იძლევა. აგრეთვე, სახელმწიფომ უნდა აამოქმედოს ფულის გათეთრებასთან ბრძოლის საერთაშორისო და ევროპული სტანდარტები. საერთაშორისო სანქციები განსაკუთრებით უნდა შეეხოს მაღალი თანამდებობის პოლიტიკურ პირებს. ოფშორული ზონებიდან ფულის გადარიცხვაში საკანონმდებლო შეღავათის დაწესება არ შეესაბამება ოფშორულ ზონებთან ბრძოლის ევროპულ ძალისხმევას". "ქართული ოცნების" ბოლოდროინდელი საკანონმდებლო ინიციატივებისა და გადაწყვეტილებების შეჯამებისას სვენ გიგოლდი აცხადებს: "არც ლგბტიქ პირთა უფლებების შეზღუდვაზე გამოცხადებული საკონსტიტუციო ცვლილება აღძრავს ნდობას, არც სამოქალაქო საზოგადოებაზე ზეწოლა და არც ქალთა უფლებების შესუსტება". სახელმწიფო მდივანი განმარტავს, რომ "ევროკავშირის წევრი სახელმწიფოებიდან კულტურული, სოციალური და გარემოსდაცვითი ორგანიზაციების ინტენსიური მხარდაჭერა არის მზარდი მეგობრობის გამოხატულება და არა დასადეკლარირებელი რესურსი. მთავრობის წინააღმდეგობრივი გზავნილები ევროკავშირში გაერთიანებაზე უკვე უქმნის საფრთხეს ინვესტიციებს ევროკავშირის კომპანიებიდან". სვენ გიგოლდი აღნიშნავს, რომ ის ხედავს გერმანული კომპანიების მუდმივ ინტერესს და ფიქრობს, რომ ევროკავშირის კანდიდატის სტატუსი ქმნის საქართველოსა და გერმანიას შორის მეგობრობის კიდევ უფრო გაღრმავების ისტორიულ შესაძლებლობას: "საქართველომ ძალიან ბევრს მიაღწია ევროკავშირთან დაახლოების გზაზე. მოსახლეობის უდიდესი უმრავლესობა მხარს უჭერს ევროკავშირში გაწევრიანებას. ევროპული მომავლის ამ შესაძლებლობას ახლა საფრთხე კი არ უნდა შეექმნას, არამედ მონდომებით უნდა იყოს გამოყენებული". გერმანიის ეკონომიკისა და კლიმატის ქმედების სამინისტროს (BMWK) სახელმწიფო მდივნის თანახმად, საქართველოში მისი ბოლო ვიზიტისას შეთანხმდა ახალი პარტნიორობა საქართველოს კონკურენციის სააგენტოსთან. სვენ გიგოლდის აზრით, საქართველოს აქვს განახლებადი ენერგიის წარმოების უდიდესი პოტენციალი. ...