ევროპის კავშირის ელჩებმა შეათანხმეს პროექტი, რომელშიც აღწერილია უკრაინის უსაფრთხოების გარანტიები. ამის შესახებ იტყობინება გერმანული გაზეთი Welt-ი, რომელიც გაეცნო დოკუმენტს. როგორც გაზეთი აღნიშნავს, პროექტს „კონფიდენციალური“ სტატუსი აქვს. დოკუმენტში საუბარია უკრაინისთვის კონსულტაციების გაწევის შესახებ ქვეყნის წინააღმდეგ პოტენციური აგრესიიდან 24 საათის განმავლობაში. მაგრამ, როგორც Welt-ი შენიშნავს, შეთანხმება გამორიცხავს ევროკავშირის ჯარისკაცების რაიმე სახით ჩართვას რუსეთის წინააღმდეგ საბრძოლო მოქმედებებში. ბრიუსელი უკრაინას დაჰპირდა, რომ გააგრძელებს ლეტალური და არალეტალური იარაღის მიწოდებას, ჯარისკაცების გაწვრთნას, დახმარებას უსაფრთხოების სექტორის რეფორმირებაში, ქვეყნის განაღმვაში და ჰიბრიდული საფრთხეებისა და კიბერთავდასხმების თავიდან აცილებაში. ასევე ნახეთ სად მივდივართ? "აგენტების კანონი" ევროპასთან უვიზო რეჟიმს ემუქრება. ბრიუსელი ზომებზე მსჯელობს დოკუმენტი ასევე ითვალისწინებს, რომ უკრაინის დახმარების ფონდის მოცულობა 2024 წელს მიაღწევს 5 მილიარდ ევროს. მომავალში ის შეიძლება გაფართოვდეს უკრაინის არმიის საჭიროებებისა და ევროკავშირის ქვეყნების შესაძლებლობების შესაბამისად. „ევროპის კავშირი და მისი წევრი სახელმწიფოები უკრაინის უსაფრთხოებასა და სიმყარეში საკვანძო როლს თამაშობენ სამხედრო, სამოქალაქო, ჰუმანიტარული, ფინანსური, სავაჭრო და ეკონომიკური დახმარების მეშვეობით, ასევე შემაკავებელი ზომებითა და დიპლომატიური მხარდაჭერით“, ნათქვამია დოკუმენტში. Welt-ის მონაცემებით, უკრაინისთვის უსაფრთხოების გარანტიების შეთავაზებას ევროკავშირის წევრებიდან ჯერჯერობით დათანხმდა მხოლოდ შვიდი სახელმწიფო: გერმანია, დანია, საფრანგეთი, იტალია, ფინეთი, ნიდერლანდი და ლატვია. შეთანხმების დადებაზე უარს ამბობს რვა სახელმწიფო: სლოვაკეთი, უნგრეთი, ხორვატია, ბულგარეთი, კვიპროსი, ირლანდია, ავსტრალია, მალტა. შვეიცარია და თურქეთი ასევე არ დათანხმდნენ შეთანხმების დადებას. მოცემულ მომენტში ბრიუსელი კიევთან განიხილავს შეთანხმების პირობებს. დაგეგმილია, რომ დოკუმენტს ხელი მოეწერება არაუგვიანეს ივლისის დასაწყისისა. როგორც მოსალოდნელია, ეს გარანტიები იმოქმედებს მანამდე, სანამ უკრაინა არ შეუერთდება ევროკავშირსა და ნატოს. ...