უკრაინის საჰაერო თავდაცვის ძალები უკანასკნელი თვეების განმავლობაში რუსეთის ჯარების მიერ გაშვებული რაკეტების მხოლოდ 30%-ს აგდებდნენ. ამის შესახებ წერს The Wall Street Journal-ი. ამასთან, უკანასკნელი ნახევარი წლის განმავლობაში უკრაინის საჰაერო თავდაცვა საშუალოდ აგდებდა რაკეტების 46%-ს, იმის წინა ნახევარი წლის განმავლობაში კი საჰაერო თავდაცვის ეფექტიანობის მაჩვენებელი 70% იყო, გამოთვალეს გამოცემის ჟურნალისტებმა იმ მონაცემებზე დაყრდნობით, რომლებსაც უკრაინის შეიარაღებული ძალების საჰაერო ძალების სარდლობა ავრცელებს. ამავე დროს უკრაინელი სამხედროები ჯერაც ახერხებენ მოიერიშე უპილოტო საფრენი აპარატების, „შაჰედების“, 80%-ის ჩამოგდებას, რომლების განადგურება უფრო იოლია. უკანასკნელი ექვსი თვის განმავლობაში „შაჰედების“ ჩამოგდების მაჩვენებელი მხოლოდ ერთი პროცენტით შემცირდა. ანალიტიკოსები აღნიშნავენ, რომ ეს დრონები რუსეთის მიერ ნაწილობრივ გამოიყენება უკრაინის საჰაერო თავდაცვის ტესტირებისთვის რაკეტების გაშვების წინ. ასევე ნახეთ გენერალ სირსკის თქმით, ფრონტზე რთული ვითარებაა მიუხედავად იმისა, რომ იერიშებისა და რაკეტების ჩამოგდების შესახებ მონაცემები არასრულია (უკრაინა ასეთ სტატისტიკას პროპაგანდისტული მიზნებით იყენებს), უკრაინის შეიარაღებული ძალების წარმომადგენელმა და თავდაცვის სფეროს დამოუკიდებელმა ანალიტიკოსმა განაცხადეს, რომ მთლიანობაში რიცხვები სწორ სურათს იძლევა. უკრაინის საჰაერო თავდაცვის შესაძლებლობების გაუარესება აიხსნება რუსეთის დრონების იერიშების გაძლიერებით, ასევე ბალისტიკური რაკეტებით იერიშებით. გარდა ამისა, კიევს უთავდება საბრძოლო მასალა დასავლეთის მიერ მისთვის მიწოდებული საჰაერო თავდაცვის კომპლექს Patriot-ისთვის, რომელიც აქამდე საჰაერო თავდასხმების მოსაგერიებლად ყველაზე ეფექტიანი საშუალება იყო. მონაცემები აჩვენებს, რომ უკანასკნელი ნახევარი წლის განმავლობაში რუსეთმა დაახლოებით 45%-ით მეტი უპილოტო საფრენი აპარატი და რაკეტა გაუშვა, ვიდრე წინა ექვსი თვის მანძილზე. WSJ ევროპულ სამხედრო დაზვერვაში არსებულ დამოუკიდებელ წყაროზე დაყრდნობით იტყობინება, რომ მომდევნო ორ თვეს გადამწყვეტი მნიშვნელობა ექნება უკრაინის შეიარაღებული ძალებისთვის, რომელიც სამხედრო მასალისა და საჰაერო თავდაცვის სისტემების შევსებას ელოდება. ...