13 მაისს პარლამენტთან, ჭიჭინაძის ქუჩაზე, “აგენტების კანონის” წინააღმდეგ მიმდინარე საპროტესტო აქციაზე დაკავებული გუკა რჩეულიშვილის ადვოკატი ბექა ბასილაია რადიო თავისუფლებას ეუბნება, რომ გუკა რჩეულიშვილი ნაცემია და, სავარაუდოდ, ცხვირი აქვს გატეხილი. დაკავებული ბექა ბასილაიამ ზაჰესის წინასწარი დაკავების იზოლატორში მოინახულა: „სავარაუდოდ, ცხვირი აქვს გატეხილი. აქვს სისხლჩაქცევები. დაკავება მოხდა ყოველგვარი სამართლებრივი საფუძვლის გარეშე. ის იყო მშვიდობიანი დემონსტრანტი. პოლიციას მიმართავდა, ერთი ქვეყანა უნდა ავაშენოთ, არ იძალადოთ ხალხზე და ა.შ. როდესაც შეითრიეს, რამდენიმე ადამიანი ურტყამდა. ეს არის სისტემური დანაშაული. ეს არ არის პოლიციელთა ინდივიდუალური გადაცდომა. პირდაპირი გეგმაა, რომ აქციის მონაწილეები პოლიციის წინა რიგებმა დააკავონ და შიდა რიგები ფიზიკურად გაუსწორდნენ. ამას ვხედავთ ახლაც და წინა დღეებშიც“. ბექა ბასილაია ამბობს, რომ გუკა რჩეულიშვილის ცემის ფაქტზე უკვე მიმართა სპეციალურ საგამოძიებო სამსახურს, ასევე შსს-ს გენერალურ ინსპექციას, თუმცა დროული და სამართლიანი გამოძიების იმედი არ აქვს: „როგორც აქამდე არავინ დაუსჯიათ, ახლაც არავის დასჯიან. პირდაპირ არიან ეს ადამიანები წაქეზებულები. ეს ადამიანები პოლიტიკურ დონეზე არიან წაქეზებულები. ეს თურმე დანაშაული კი არა, ეს არის სამწუხარო გადაცდომები, როგორც ამას პრემიერი და შსს მინისტრი უწოდებენ“. გუკა რჩეულიშვილის მეგობარი სოფო კუჭავა რადიო თავისუფლებას უყვება, რომ მისი მეგობარი „სრულიად უწყინარ სიტუაციაში“ დააკავეს. „მე მეგაფონით ვიდექი, გუკაც ახლოს იდგა ჩემთან და პოლიციელებს ელაპარაკებოდა, ჩვენს მხარეს უნდა გადმოხვიდეთო. სრულიად უწყინარი ვითარება იყო. გუკა გამოესარჩლა აქციის ერთ მონაწილეს და უცებ სტაცეს ხელი და შეითრიეს. არცერთ მომენტში ჭიჭინაძეზე არ ყოფილა აქციის მონაწილეების მხრიდან აგრესია, გარდა შეძახილებისა. დაკავებების დროს ისროლეს რამდენჯერმე წყლის ბოთლები და ისიც მალევე აღკვეთეს ისევ დემონსტრანტებმა. აბსოლუტურად არანაირი საფუძველი არ იყო იქ იმისა, რომ აქციის მონაწილეები დაეკავებინათ და თან ასეთი სასტიკი მეთოდებით“. ორშაბათს დილით, სანამ მმართველი პარტია იურიდიული კომიტეტის სხდომაზე „აგენტების შესახებ“ კანონს მესამე მოსმენით სულ რაღაც 67 წამში დაამტკიცებდა, სამართალდამცავებმა პარლამენტთან 20 ადამიანი დააკავეს, მათ შორის - ორი ამერიკის და ერთი რუსეთის მოქალაქე. შინაგან საქმეთა სამინისტროს პრესსამსახურის ინფორმაციით, ისინი წვრილმანი ხულიგნობისა და პოლიციის მოთხოვნისადმი დაუმორჩილებლობისთვის არიან დაკავებული. ასევე ნახეთ წიხლები და მუშტები ხელებშეკრულ დემონსტრანტებს - წახალისებული ძალადობა? ...