13 მაისს აქციაზე დაკავებული ერთ-ერთი დემონსტრანტი გურამ ადამია კლინიკაშია გადაყვანილი. ინფორმაციას რადიო თავისუფლებას უდასტურებს "ადამიანის უფლებათა ცენტრის" იურისტი ეკა ქობესაშვილი. მისი თქმით, გურამ ადამია დიღმის წინასწარი დაკავების იზოლატორში გახდა შეუძლოდ და იქიდან გადაიყვანეს კლინიკაში: “შეასახლეს იზოლატორში, იქ გახდა ცუდად, ესაჭიროებოდა სასწრაფო სამედიცინო დახმარება და გადაიყვანეს საავადმყოფოში. აქ უნდა აღინიშნოს, რომ ის იზოლატორში არ უნდა შეესახლებინათ და თავიდანვე უნდა გადაეყვანათ კლინიკაში, იმდენად ცუდად იყო. მე არ ვარ მისი ადვოკატი, თუმცა დიღმის იზოლატორში ყოფნისას ვნახე”, - ეუბნება რადიო თავისუფლებას ეკა ქობესაშვილი, რომელიც 13 მაისის აქციაზე დაკავებული ორი სხვა დემონსტრანტის ინტერესებს იცავს. თავად გურამ ადამიას ადვოკატთან დაკავშირება ამ დროისათვის ვერ ხერხდება. ტელეკომპანია "იმედის" ცნობით, გურამ ადამია მოლდოვის მოქალაქეა. ხელისუფლების მიმართ ლოიალურად განწყობილი ტელეკომპანია წერს, რომ ის აქციის ერთ-ერთი ორგანიზატორია. მათი ინფორმაციით, გურამ ადამია პროვოკაციაზე წამოგების მიზნით, პოლიციელებს "სიტყვიერ შეურაცხყოფას აყენებდა, რის შემდეგაც ფიზიკურ დაპირისპირებაზე გადავიდა და სამართალდამცველების მისამართით გაზი გამოიყენა". ეკა ქობესაშვილის თქმით, ნაცემები არიან აქციაზე დაკავებული მისი დაცვის ქვეშ მყოფი პირებიც: "აქვთ სხვადასხვა ტიპის დაზიანება სახის და ტანის არეში. მათი თქმით, პარლამენტის უკან მიაყენეს სამართალდამცავებმა ფიზიკური და სიტყვიერი შეურაცხყოფა. მათი მხრიდან არ ყოფილა არანაირი სამართალდარღვევა. მათ ვინაობას ვერ გავამჟღავნებ, რადგან ასეთი შეთანხმება ამ ეტაპზე არ გვქონია." რადიო თავისუფლება ცდილობს აქციაზე დაკავებულთა ჯანმრთელობის მდგომარეობის შესახებ ინფორმაციის მოძიებას. ვერც ჯანდაცვის და ვერც შინაგან საქმეთა სამინისტროებისგან ამ ეტაპზე ინფორმაციის მოპოვება ვერ ხერხდება. ორშაბათს დილით, სანამ მმართველი პარტია იურიდიული კომიტეტის სხდომაზე „აგენტების შესახებ“ კანონს მესამე მოსმენით, სულ რაღაც 67 წამში დაამტკიცებდა, სამართალდამცავებმა პარლამენტთან 20 ადამიანი დააკავეს, მათ შორის - ორი ამერიკის და ერთი რუსეთის მოქალაქე. შინაგან საქმეთა სამინისტროს პრესსამსახურის ინფორმაციით, ისინი წვრილმანი ხულიგნობისა და პოლიციის მოთხოვნისადმი დაუმორჩილებლობისთვის არიან დაკავებული. ასევე ნახეთ წიხლები და მუშტები ხელებშეკრულ დემონსტრანტებს - წახალისებული ძალადობა? ...