13 მაისს, „აგენტების კანონის“ წინააღმდეგ გამართული საპროტესტო აქციაზე, პარლამენტთან დაკავებულ ამერიკის ორ მოქალაქეს პროპაგანდისტული არხები საქართველოში არეულობის ორგანიზებასა და რევოლუციის დაგეგმვაში ადანაშაულებენ. „ხალხის ძალის“ ტელევიზიის - „POSTV“-ის ჟურნალისტის, ნათია ბერიძის მიერ შექმნილ ტელეგრამარხზე - „ამხილე“, ფოტოები გამოქვეყნდა. ამ არხის მტკიცებით, ფოტოებზე აღბეჭდილი პირები 13 მაისს დაკავებული ამერიკის მოქალაქეები და „აკერმანის ინსტრუქტორები“ არიან: "აკერმანის ინსტრუქტორი, რომელიც საქართველოში ჩამობრძანდა ამერიკიდან რევოლუციის მოსაწყობად. ვინმეს რამე კითხვები დაგრჩათ?" გავრცელებულ ინფორმაციას სოციალურ ქსელში გამოეხმაურა ბექა ბერიკაშვილი, ინგლისური ენის სკოლის, „ბექას სკოლის“ დამფუძნებელი, რომელიც წერს, რომ ერთ-ერთი დაკავებული, პატრიკ ჰერნანდესი, წლების განმავლობაში მათი სკოლის პედაგოგი იყო: „ინგლისურის მასწავლებელია ხალხო, ეს რა სიგიჟეა“. три 2022 წელს გარდაცვლილ პიტერ აკერმანს, რომელიც „არაძალადობრივი კონფლიქტების საერთაშორისო ცენტრის“ დამფუძნებელი იყო, საქართველოს ხელისუფლება პერიოდულად ქვეყანაში გადატრიალების მცდელობაში ადანაშაულებდა. აკერმანი იყო IREX-ის გლობალური მრჩეველთა საბჭოს წევრი. ის, ასევე, იყო Freedom House-ის თავმჯდომარე, შეერთებული შტატების მშვიდობის ინსტიტუტის საერთაშორისო მრჩეველთა კომიტეტის თანათავმჯდომარე, ატლანტიკური საბჭოს აღმასრულებელი კომიტეტის წევრი. რადიო თავისუფლებასთან საუბრისას ბექა ბერიკაშვილი ამბობს, რომ პატრიკ ჰერნანდესი საქართველოში ინგლისური ენის მასწავლებლად ჩამოვიდა და სოციალურ ქსელში გავრცელებული ბრალდება აბსურდულია: „დაახლოებით ერთი წელია ჩვენთან აღარ ასწავლის, მაგრამ დანამდვილებით შემიძლია ვთქვა, რომ პატრიკი აქ ინგლისური ენის მასწავლებლად ჩამოვიდა რამდენიმე წლის წინ. ასობით მოსწავლე ჰყავდა მხოლოდ ჩვენთან. სწორედ ამ მიზნით არის ის საქართველოში ჩამოსული და ახლა ისეთ აბსურდს წერენ, გადატრიალების მოსაწყობად ჩამოვიდაო, წარმოუდგენელია“. პატრიკ ჰერნანდესის შესახებ წერს სოციალურ ქსელში მისი მეგობარი, ნიკა გიგოლაშვილი: „ჩვენი მეგობარი, რომელსაც 4 თუ 5 წელია ვიცნობთ. ერთად მთელი საქართველო რომ გვაქვს შემოვლილი და კარგად გატარებული დროის მეტი რომ არაფერი გვახსენდება“. აქციაზე დაკავებული ამერიკის მოქალაქეების, მათი ჯანმრთელობის მდგომარეობის შესახებ ინფორმაციის გადამოწმებას რადიო თავისუფლება ამერიკის საელჩოსთანაც ცდილობს. ამერიკის მოქალაქეების დაკავების ფაქტზე რეაგირებას სთხოვენ სახელმწიფო დეპარტამენტს სოციალურ ქსელ X-ზე (ყოფილი ტვიტერი). "რუსული რეჟიმის პირობებში შეერთებული შტატების მოქალაქეებიც არ არიან დაცული. რჩება მხოლოდ ერთი კითხვა: სად არის სანქციები?" - კითხულობს მომხმარებელი, რომელიც პრო...