საქართველოს უნივერსიტეტების რექტორების მუდმივმოქმედი კონფერენციის წევრები განცხადებით ეხმაურებიან "აგენტების კანონის" საწინააღმდეგო პროტესტს და სტუდენტების გაფიცვას. რექტორთა კონფერენციის თავმჯდომარეა საქართველოს ტექნიკური უნივერსიტეტის რექტორი დავით გურგენიძე. საბოლოო წერილი სწორედ ტექნიკური უნივერსიტეტის ვებსაიტზე გამოქვეყნდა 14 მაისს, მედიებმა წინა დღეს გაასაჯაროვეს - "ტაბულის" ინფორმაციით, ამ განცხადებაზე ხელმოსაწერად კოლეგები ტექნიკური უნივერსიტეტის რექტორმა დაიბარა. "ფორმულა" კი წერდა, რომ წერილის ტექსტი განათლების სამინისტროდან გაუგზავნეს რექტორებს და მათგან ხელმოწერა მოითხოვეს. აკადემიკოსი დავით გურგენიძე რადიო თავისუფლებასთან გავრცელებულ ინფორმაციებს უარყოფს და ამბობს, რომ ტექტი შედგა ადგილზე და ბევრჯერ შეიცვალა საბოლოო სახის მიღებამდე. გავრცელებულ წერილში ნათქვამია, რომ აკადემიური სფერო პოლიტიკური პროცესების მიღმა უნდა რჩებოდეს და ლექტორები, რომლებიც არ ატარებენ ლექციებს, არღვევენ შრომით ხელშეკრულებებს. "ჩვენი ევროპული მომავლის ფუნდამენტური საფუძველია, თავისუფალ და არადისკრიმინაციულ გარემოში ახალგაზრდების განათლება. აქედან გამომდინარე მიგვაჩნია, რომ ნებისმიერი პოლიტიკური პროცესი აკადემიური სივრცის მიღმა უნდა დარჩეს. შესაბამისად, ის არ უნდა აისახოს უნივერსიტეტების ფუნქციონირებასა და სწავლა-სწავლების წარმართვაზე. არ უნდა მოხდეს სტუდენტთა ინტერესებისა და სასწავლო პროცესის დაზიანება. ხაზს ვუსვამთ, რომ ჩვენთვის ფუნდამენტურად ღირებულია გამოხატვის თავისუფლების გარანტირება. მიუღებელია, რომ აკადემიური პერსონალის ზოგიერთი წარმომადგენელი უარს აცხადებს საკუთარი მოვალეობის შესრულებაზე. ამით ხელი ეშლება სასწავლო პროცესის წარმართვას. ეს არღვევს სტუდენტის კონსტიტუციურ უფლებას. თითოეული უნივერსიტეტის, მისი პროფესორ-მასწავლებლების ვალდებულებაა, უზრუნველყოს სტუდენტებისთვის სასწავლო პროცესის უწყვეტად წარმართვა და საუნივერსიტეტო სივრცეებში პოლიტიკისგან თავისუფალი, ჯანსაღი და აკადემიური საგანმანათლებლო გარემოს შექმნა", - ნათქვამია განცხადებაში. ტექსტი, რომელიც 14 მაისს ტექნიკური უნივერსიტეტის ვებსაიტზე გამოქვეყნდა, თითქმის იდენტურია წინა დღეს მედიების მიერ გამოქვეყნებული წერილის ტექსტთან. ამ განცხადებას ხელს აწერს 38 უნივერსიტეტი - მათ შორის არ არიან ილიას სახელმწიფო უნივერსიტეტი, თავისუფალი და აგრარული უნივერსიტეტები, ალტე უნივერსიტეტი, GIPA, ბიზნესისა და ტექნოლოგიების უნივერსიტეტი, ვებსტერის უნივერსიტეტი, ნიუ ვიჟენ უნივერსიტეტი, სულხან საბა ორბელიანის უნივერსიტეტი, ალტერბრიჯი და საქართველოს უნივერსიტეტი. ამ უკანასკნელმა მიმდინარე პროცესების გათვალისწინებით, ერთი კვირით შეწყვიტა სასწავლო პროცესი. რექტორების კონფერენციის განცხ...