„აგენტების კანონის“ საწინააღმდეგო დემონსტრაციების მონაწილე ლაზარე გრიგორიადისი, რომელიც 14 მაისს პარლამენტის წინ კიდევ ერთხელ დააკავეს, ადვოკატის ინფორმაციით, ნაცემია. "მხნედ არის, მაგრამ საკმაოდ ნაცემია. სახე აქვს დაზიანებული, თავზეც აქვს დაზიანებები, ხელბორკილებისგან ნაჭდევები აქვს ხელებზე, სტკივა თავი და გვერდები. როგორც ამბობს, პოლიცია გამეტებით ურტყამდა ფეხებს თავის არეში, აყენებდა ფიზიკურ შეურაცხყოფას და დაკავებიდან რამდენიმე საათის განმავლობაში ჰყავდათ გაჩერებული პარლამენტის ეზოში, სანამ ჯერ სამმართველოში და შემდეგ იზოლატორში გადაიყვანდნენ. აქვს შეგრძნება, რომ წინასწარ ჰქონდა პოლიციას მისი დაკავება, სპეციალურად მის დასაკავებლად გამოვარდნენ მისი მიმართულებით", - ეუბნება გრიგორიადისის ადვოკატი ეკა ქობესაშვილი რადიო თავისუფლებას. მან 14 მაისს, ღამის საათებში, მოინახულა გრიგორიადისი დიღმის მთავარ სამმართველოში. შეხვედრამ დაახლოებით ნახევარ საათს გასტანა. „დროებითი მოთავსების იზოლატორში, სადაც მოხდა მისი შესახლება, რამდენიმე საათის განმავლობაში მას ხელბორკილები ჰქონდა მჭიდროდ მოჭერილი და აქვს ეს დაზიანებები, რაც წარმოადგენს, რა თქმა უნდა, დარღვევას. ეს არის არაადამიანური მოპყრობა. მას რამდენიმე სპეცრაზმელი გაუსწორდა ფიზიკურად. გონებაც დაკარგა ცემის მომენტში, არ ახსოვს რაღაც მომენტები. ექიმმა ნახა და ამ ეტაპზე საჭიროდ არ ჩათვალა მისი კლინიკაში გადაყვანა, თუმცა თქვა, რომ საჭიროებს ექიმის მეთვალყურეობის ქვეშ ყოფნას", - ამბობს ეკა ქობესაშვილი. ქობესაშვილის განმარტებით, ლაზარე გრიგორიადისი დაკავებულია ადმინისტრაციული წესით, მას წვრილმან ხულიგნობასა და პოლიციის კანონიერი მოთხოვნისადმი დაუმორჩილებლობას ედავებიან, თუმცა, ადვოკატის თქმით, „ყველამ ნახა ის კადრები, მსგავს ადმინისტრაციულ დარღვევას ადგილი იქ არ ჰქონია“. გამოძიების დაწყების მიზნით, ეკა ქობესაშვილი აპირებს მიმართოს სპეციალურ საგამოძიებო სამსახურს. ასევე ნახეთ "დიახ, მეგობრებო, ლაზარე ისევ დაიჭირეს!" - ლაზარე გრიგორიადისის დედა დაზიანებები აქვს ლაზარე გრიგორიადისის მეგობარ გოგოსაც, რომელიც აქციაზე მასთან ერთად იმყოფებოდა პარლამენტის წინ, როცა პოლიციამ დემონსტრანტების დაკავება დაიწყო - როგორც თიკო ჩაფიძე ამბობს, პოლიციამ ლაზარესთან ერთად ისიც დააკავა, მაგრამ სანამ პარლამენტის ეზოში შეიყვანდნენ, სადაც დაკავებულებს აგროვებდნენ, რამდენჯერმე ჰკითხეს, გოგო იყო თუ არა და როცა დარწმუნდნენ, რომ გოგო იყო, გაუშვეს. თიკო ახლაც კლინიკაშია - მან დაკავებისას თავი დაარტყა ქვაფენილზე, დაზიანებული აქვს ნეკნი და ხელი. ასევე ნახეთ პოლიციამ 180-ზე მეტი ადამიანი დააკავა "აგენტების კანონის" საწინააღმდეგო აქციებზე 15 აპრილიდან 14 მაისის ჩათვლით პარლამენტ...