ისრაელის არმიის ცნობით, პალესტინელთა ტერიტორიაზე, ღაზის სექტორში მიმდინარე საომარი მოქმედებების დროს ჯარისკაცებმა შეცდომით მოკლეს ხუთი თანამებრძოლი. სამხედროების თანახმად, კიდევ სამი ჯარისკაცი მძიმედ დაიჭრა. მედიის ცნობით, ისრაელის ტანკებმა ჭურვები დაუშინეს შენობას ჯაბალიაში, ლტოლვილთა დასახლებაში - ამ შენობაში მყოფი ისრაელელი ჯარისკაცები მათ შეიარაღებულ პალესტინელებად მიიჩნიეს და ცეცხლი გაუხსნეს. ოქტომბრის ბოლოდან სახმელეთო იერიშის დაწყების შემდეგ, ღაზის სექტორში სულ დაიღუპა ისრაელის 278 სამხედრო. გასულ დღეებში ღაზის სექტორის ჩრდილოეთში ბრძოლები გახშირდა. ისრაელის არმიამ საომარი მოქმედება ღაზის სექტორში დაიწყო მას შემდეგ, რაც გასული წლის 7 ოქტომბერს ექსტრემისტული დაჯგუფება ჰამასი მის ტერიტორიაზე შეიჭრა და 1200-მდე პირი მოკლა, 250 კი მძევლად აიყვანა. ჰამასი ევროკავშირისა და ამერიკის შეერთებული შტატების მიერ ტერორისტულ ორგანიზაციადაა გამოცხადებული. მას შემდეგ, პალესტინელთა ჯანდაცვის უწყების მონაცემებით, ღაზის სექტორში 35 ათასი ადამიანი დაიღუპა. რეგიონში ჰუმანიტარული კრიზისია. ასევე ნახეთ ბრძოლა მწვავდება ღაზის ჩრდილოეთსა და სამხრეთში ...