2022 წლის თებერვლიდან რუსეთის მიერ კონტროლირებად უკრაინის ტერიტორიებზე დარეგისტრირდა 892 სასოფლო-სამეურნეო კომპანია, რომელთა ნახევარზე მეტი გახსნეს ბიზნესმენებმა რუსეთის რეგიონებიდან, დანარჩენი კი - ადგილობრივებმა. ასეთ მონაცემებს მოუყარა თავი ახალ ანგარიშში საგამოძიებო პროექტმა „ვაჟნიე ისტორიი“. მასში ლაპარაკია კომპანია „არგო 24-ზე", რომელიც მიმდინარე წლის თებერვალში დარეგისტრირდა ხერსონის ოლქის სოფელ აკსანია-ნოვაში. ჟურნალისტების ინფორმაციით, კომპანია ჩეჩნეთის მკვიდრ, 43 წლის ელბეკ ზაიევს ეკუთვნის. სარეგისტრაციო დოკუმენტებში ნათქვამია, რომ კომპანია დაკავებული იქნება მარცვლეული კულტურების გაშენებით, მარცვლეულის საბითუმო ვაჭრობით და სხვა სასოფლო-სამეურნეო საქმიანობით. როგორც "ვაჟნიე ისტორიიმ" გაარკვია, კომპანიის მფლობელის, ალი ზაიევის ძმა მსახურობს რუსეთის ეროვნული გვარდიის 94-ე ოპერატიულ პოლკში, რომელიც უკრაინაში შეჭრაში მონაწილეობდა. გამოძიებაში ასევე ნათქვამია, რომ ალი ზაიევი, სავარაუდოდ, ჩეჩნეთის ხელმძღვანელთან, რამზან კადიროვთან, დაახლოებულ უსაფრთხოების მაღალჩინოსანთა შორისაა. ჟურნალისტებმა მოიპოვეს ფოტო, რომელზეც ალი ზაიევი რამზან კადიროვთან, ალიბეკ დელიმხანოვთან და რუსლან გერემეევთან ერთად არის გამოსახული. ამ უკანასკნელს ბორის ნემცოვის ოჯახი ოპოზიციონერი პოლიტიკოსის მკვლელობის ორგანიზატორს უწოდებს. ასევე ნახეთ ნემცოვის მკვლელობის ორგანიზებაში ეჭვმიტანილი რუსლან გერემეევი ჩეჩნეთში შექმნილ ახალ ბატალიონს უხელმძღვანელებს როგორც "ვაჟნიე ისტორიი" აღნიშნავს, ჯერ კიდევ ძნელია იმის თქმა, თუ რამდენი გამოიმუშავა ხერსონის რეგიონიდან მარცვლეულის ვაჭრობით ელბეკ ზაიევმა. კომპანია „არგო 24-ს" ჯერ არ გამოუქვეყნებია ფინანსური ანგარიში, ხოლო ოკუპირებულ ტერიტორიებზე მარცვლეულის ყიდვა ჩვეულებრივ ნაღდი ანგარიშსწორებით ხორციელდება. უკრაინის ხელისუფლების განცხადებით, 2023 წელს რუსებმა ოკუპირებული ტერიტორიებიდან თითქმის ხუთი მილიონი ტონა მარცვლეულის ექსპორტი განახორციელეს. ...