პარასკევს საღამოს აფეთქება მოხდა სანქტ-პეტერბურგში, ბუდიონის სახელობის კომუნიკაციების სამხედრო აკადემიის ტერიტორიაზე. წინასწარი მონაცემებით, მიზეზი შესაძლოა იყოს უპილოტო საფრენი აპარატების იერიში. ამავე დროს ადგილობრივი გამოცემა „როტონდა“ იტყობინება სასწავლო ამუნიციის საწყობის აფეთქების შესახებ. გამოცემა „ბუმაგა“ თვითმხილველებზე დაყრდნობით იუწყება, რომ აფეთქება მოხდა შენობის შიგნით. მედია ავრცელებს ინფორმაციას შვიდი დაშავებულის შესახებ, მათგან ორი მძიმედ არის დაჭრილი და ისინი სასწრაფო დახმარებამ საავადმყოფოში წაიყვანა. ერთ-ერთი დაშავებული სარეანიმაციო განყოფილებაშია. ასევე ნახეთ დრონებით მასირებული შეტევა იყო რუსეთის კრასნოდარის მხარის ობიექტებზე ლენინგრადის სამხედრო ოლქის წარმომადგენლები აცხადებენ, რომ აფეთქების მიზეზია „მეორე მსოფლიო ომის დროინდელი 76-მილიმეტრიანი ჭურვის უნებური დეტონაცია“. ის აფეთქდა სარემონტო სამუშაოებისას აკადემიის ერთ-ერთი კორპუსის სარდაფში. სანქტ-პეტერბურგის გუბერნატორმა ალექსანდრ ბეგლოვმა განაცხადა, რომ ინციდენტს არა აქვს ტერორისტული ხასიათი. მან ასევე თქვა, რომ ის თავდაცვის სამინისტროს პასუხისმგებლობას ექვემდებარება და არა ქალაქის ადმინისტრაციისას. სანქტ-პეტერბურგსა და ლენინგრადის ოლქში ხშირი არ არის უპილოტო საფრენი აპარატების იერიშები. იანვარში დრონმა პირველად მოახვედრა მიზანში ობიექტს ლენინგრადის ოლქში, უსტ-ლუგის პორტში. კომპანია „ნოვატეკის“ ტერმინალში ხანძარი გაჩნდა. კომპანიის თანახმად, ეს დრონების შეტევა იყო. უკრაინის წყაროები ირწმუნებოდნენ, რომ ოპერაცია უკრაინის უშიშროების ძალებმა განახორციელეს. 31 იანვარს საჰაერო თავდაცვის მიერ ჩამოგდებული დრონი სანქტ პეტერბურგში ჩამოვარდა კომპანია „ნევსკი მაზუტის“ ტერიტორიაზე. მარტში იტყობინებოდნენ, რომ სანქტ-პეტერბურგის დიდმა პორტმა უპილოტო საფრენი აპარატებით გახშირებული იერიშების გამო შეწყვიტა ამონიუმის ნიტრატის გადაზიდვა. აპრილში სანქტ-პეტერბურგის ადმინისტრაციამ გამოაქვეყნა პროექტი კანონისა, რომლის თანახმადაც იკრძალება დრონების შეტევათა შედეგებზე ნებისმიერი ინფორმაციის გავრცელება. ...