ღაზის სექტორის სამხრეთში მიმდინარე ოპერაციის დროს ისრაელის სამხედროებმა სამი მძევლის, ორი ქალის და ერთი კაცის გვამები აღმოაჩინეს. რაფაჰში მიკვლეული გვამები ეკუთვნის 7 ოქტომბერს თავდასხმის დროს გატაცებულ პირებს. ეს ინფორმაცია გაავრცელა პრესკონფერენციაზე ისრაელის არმიის პრესმდივანმა, დანიელ ჰაგარიმ, რომლის თანახმად, გვამები უკვე გადაიტანეს ისრაელში დასასაფლავებლად. სამი დაღუპული, როგორც ჰაგარიმ განაცხადა, თავდასხმის დროს ისრაელის და ღაზის სექტორის მახლობლად, ნეგევის უდაბნოში მიმდინარე მუსიკალური ფესტივალის მაყურებლები იყვნენ. სავარაუდოდ, ისინი 7 ოქტომბერსვე დაიღუპნენ და ჰამასი (აშშ-სა და ევროკავშირში ტერორისტულ ორგანიზაციად შერაცხილი დაჯგუფება) მათ გვამებს ინახავდა. 22 წლის შანი ლუკი ისრაელის და გერმანიის მოქალაქე იყო. მისი სიკვდილის შესახებ ცნობილი გახდა უკვე 29 ოქტომბერს. მეორე დაღუპული 28 წლის ამიტ ბუსკილაა, მესამე - იცხაკ გერელენტერი, მისი ასაკი არ დაუსახელებიათ. ისრაელის პრემიერ-მინისტრმა, ბენიამინ ნეთანიაჰუმ პირობა დადო, რომ ისრაელი თავის მძევლებს, ცოცხლებს თუ მკვდრებს დაიბრუნებს. ამჟამად ისრაელის არმია ახორციელებს ფართომასშტაბიან სამხედრო ოპერაციას ღაზის სექტორში 7 ოქტომბრის თავდასხმის საპასუხოდ, როცა 1200 პირი იქნა მოკლული ჰამასის თავდასხმის დროს. 240-მდე ისრაელელი და უცხოელი იქნა გატაცებული ღაზაში. მათგან 130 კვლავ გატაცებულად ითვლება, არ არის ცნობილი, რამდენია მათ შორის ცოცხალი. ისრაელის სამხედრო ოპერაციის განმავლობაში, ოქტომბრის შემდეგ, ღაზის სექტორის ჯანდაცვის უწყების მონაცემებით, 35 ათასამდე ადამიანია დახოცილი. რეგიონი ალყაშია მოქცეული, რამაც გამოიწვია მძიმე ჰუმანიტარული კრიზისი. სრულიად განადგურებულია ინფრასტრუქტურა. ცეცხლის შეწყვეტის სანაცვლოდ მძევლების გათავისუფლების შესახებ ბოლო პერიოდში მიმდინარე მოლაპარაკებამ ჯერ შედეგი ვერ გამოიღო. ნოემბერში მსგავსი მორიგების შედეგად ჰამასმა მძევალთა ნაწილი გაათავისუფლა. ასევე ნახეთ ისრაელმა შეიძლება რაფაჰზე იერიში გადადოს, თუ მძევლების გამო შეთანხმებას მიაღწიეს ასევე ნახეთ ჰამასის შეიარაღებულმა ფრთამ გამოაქვეყნა ვიდეო ორი მძევლით, რომლებიც ღაზაში ჰყავთ დატყვევებული ...