18 მაისს, გაეროს პალესტინელ ლტოლვილთა სააგენტოს ხელმძღვანელმა განაცხადა, რომ 800 ათასი ადამიანი "გახდა იძულებული გაქცეულიყო" ღაზის უკიდურეს სამხრეთში მდებარე ქალაქ რაფაჰიდან მას შემდეგ, რაც იქ ისრაელმა სამხედრო ოპერაციები დაიწყო. "რაფაჰის მოსახლეობის თითქმის ნახევარი - 800 ათასი ადამიანი გზაშია, რადგან იძულებული იყვნენ გაქცეულიყვნენ მას შემდეგ, რაც ისრაელის ძალებმა ამ არეალში სამხედრო ოპერაციები დაიწყეს 6 მაისს", - განაცხადა გაეროს პალესტინელ ლტოლვილთა სააგენტოს უფროსმა, ფილიპ ლაცარინიმ თავის პოსტში სოციალურ მედია X-ზე. ღაზელები ევაკუაციის შესახებ განკარგულების მიხედვით, გაიქცნენ "შუა რაიონებში და ხან-იუნისში, მათ შორის, დანგრეულ შენობებში", - თქვა მან. "ყოველ ჯერზე, ისინი იძულებული არიან დატოვონ ის მცირედიც, რაც გააჩნიათ... ყოველ ჯერზე, ნულიდან უნდა დაიწყონ, სულ თავიდან". ისრაელმა განაცხადა, რომ სახმელეთო თავდასხმა რაფაჰზე გადამწყვეტი იყო ბრძოლისთვის პალესტინელ მებრძოლთა წინააღმდეგ და ამტკიცებდა, რომ ეს იყო ჰამასის (აშშ-ში და ევროკავშირში ტერორისტულ ორგანიზაციად შერაცხილი) ბოლო სიმაგრე ღაზაში. სამხედრო ოპერაციის დაწყებამდე, ისრაელმა ასობით ათას ღაზელს, რომლებიც ქალაქის აღმოსავლეთ ნაწილებში აფარებდა თავს, მიმართა, დაეტოვებინათ იქაურობა და იქ თავის ოპერაციას "შეზღუდული" უწოდა. ისრაელის უახლოესმა მოკავშირემ, შეერთებულმა შტატებმა, მტკიცე წინააღმდეგობა გამოთქვა ოპერაციების გავრცობის შესახებ რაფაჰში, რომელსაც 1,4 მილიონი მშვიდობიანი პალესტინელი მოსახლე აფარებდა თავს ოპერაციის დაწყებამდე. მძიმე შეტაკებებმა და დაბომბვამ შეძრა რაფაჰი 18 მაისს, როცა ისრაელმა იერიში განახორციელა ჰამასის მებრძოლთა წინააღმდეგ. AFP-ს რეპორტიორის თქმით, საჰაერო დარტყმები და საარტილერიო ჭურვები თავს დაატყდა ქალაქის აღმოსავლეთ ნაწილებს მაშინ, როცა სამხედრო თვითმფრინავები დაფრინავდნენ მის თავზე. ლაცარინის თქმით, ხალხი გარბოდა იმ რაიონებში, სადაც არ არის წყლის მარაგები ან შესაბამისი სანიტარული პირობები. ალ-მავასი, 14 კვადრატულ კილომეტრიანი ქალაქი სანაპიროზე, ისევე როგორც ცენტრალური ქალაქი, დიერ ელ-ბალაჰი, "გადავსებული" იყო ადამიანებით, რომლებმაც ახლა ჩააღწიეს იქ ,” - დასძინა ლაცარინიმ. ასევე ნახეთ გაერო განგაშს ტეხს რაფაჰზე ისრაელის იერიშის ფონზე ასევე ნახეთ ისრაელმა რაფაჰიდან ევაკუაციის ახალი განკარგულება გასცა, მისი ჯარები სრულმასშტაბიანი ოპერაციისთვის ემზადებიან ...