„გვახსოვს, ვმკურნალობთ სიყვარულით და სოლიდარობით“ - ამ დევიზით აღნიშნავს მსოფლიო 2024 წელს მსოფლიო შიდსით გარდაცვლილთა ხსოვნის საერთაშორისო დღეს, რომელიც ინფექციური პათოლოგიისა და შიდსის ცენტრის ორგანიზებით, ტრადიციულად, საქართველოშიც აღინიშნა. მათ პატივი მიაგეს შიდსით გარდაცვლილთა ხსოვნას, აანთეს სანთლები და სიმბოლურად წითელი საჰაერო ბუშტები გაუშვეს. ინფექციური პათოლოგიისა და შიდსის ცენტრის ცნობით, საქართველოში, 2024 წლის 19 მაისის მონაცემებით, რეგისტრირებულია 10 608 აივ ინფიცირებული პირი, მათგან 7945 – მამაკაცი და 2663 – ქალია. 2263 პაციენტი გარდაიცვალა. 2024 წელს გამოვლინდა აივ ინფექციის 217 ახალი შემთხვევა. არვ (ანტირეტროსულ) თერაპიას იტარებს 6000-ზე მეტი პაციენტი, მათ შორის 42 – ბავშვი. რეგისტრირებულ შემთხვევათა განაწილება კი გადაცემის გზების მიხედვით ასე გამოიყურება: 32.0 % – ნარკოტიკების ინექციური მოხმარება; 52.0 % – დაინფიცირდა ჰეტეროსექსუალური კონტაქტის შედეგად; 14.0 % – მამაკაცები რომელთაც სექსი აქვთ მამაკაცთან; 1.1 % – დაინფიცირდა ვერტიკალური გადაცემის გზით; 0.4 % – სისხლის გადასხმის შედეგად; 0.5 % – გადაცემის გზა დაუდგენელია. აივ/შიდსის ყველაზე მეტი შემთხვევა რეგისტრირებულია თბილისში, შემდეგ მოდის სამეგრელო, იმერეთი, აჭარა, აფხაზეთი, ქვემო ქართლი, კახეთი, შიდა ქართლი, გურია, სამცხე-ჯავახეთი და ა.შ. შიდსით გარდაცვლილთა რაოდენობამ მსოფლიოში უკვე 40 მლნ -ს გადააჭარბა. აივ/შიდსით მცხოვრები ადამიანების რიცხვი კი მსოფლიოში 39 მლნ-ზე მეტია. მათმა მხოლოდ 85%-მა იცის თავისი აივ სტატუსის შესახებ, ხოლო აივ თერაპიას გადის ინფიცირებული პირების მხოლოდ 75%. შიდსით გარდაცვლილთა ხსოვნის დღე პირველად სან-ფრანცისკოში 1983 წელს აღინიშნა. მოგვიანებით ამ დღის აღნიშვნა საერთაშორისო ტრადიციად იქცა და ყოველი წლის მაისის მესამე კვირას ათასობით ადამიანი ხელში ანთებული სანთლებით გამოდის ქუჩებში, რათა სოლიდარობა გამოუცხადოს აივ ინფექციით მცხოვრებ ადამიანებს და მათ ახლობლებს. საქართველოში აივ ტესტირება კონფიდენციალური და უფასოა. ცხელი ხაზის ნომერია: 239 80 18. ...