20 მაისს პარტია "გირჩი - მეტი თავისუფლების" ლიდერი ზურაბ ჯაფარიძე კრიმინალურმა პოლიციამ თბილისის საქალაქო სასამართლოში მოსამართლის თანდასწრებით გამოჰკითხა. როგორც ის ჟურნალისტებთან საუბარში ჰყვება, საქმე "იქითკენ მიჰყავთ, თითქოს რაღაც ძალადობრივის ორგანიზატორია." ჯაფარიძის თქმით, შსს-მ მტკიცებულების სახით რამდენიმე წლის წინ გაკეთებული ჩანაწერები წარადგინა. "თავიდან ზოგადი კითხვები იყო - ამ რიცხვში სად იყავი, იმ რიცხვში სად იყავიო. შემდეგ საუბარი წაიყვანეს იქითკენ, "იმედმა" სუსის მიერ გაკეთებული ჩანაწერები რომ გაუშვა. ეს ჩანაწერები ორი ან მეტი წლის წინ არის გაკეთებული, სადაც მე ვხვდები მხარდამჭერებს. დედა ენის ბაღშია ჩაწერილი, სუსის თანამშრომელი გადაღებული გვყავს, მაშინ დავდეთ კიდეც საჯაროდ. იმ ჩანაწერებში რაღაცებს ამბობო... მოკლედ, სამი წლის წინ რაც ვილაპარაკე, მაგას ამ აქციებს აბამენ... კითხვები იყო, ოდესმე დაგიორგანიზებიათ თუ არა ძალადობრივი რაღაც. ვეუბნებოდი, რომ - არა. [საქმე] მიჰყავთ იქითკენ, რომ თითქოს მე ვარ რაღაც ძალადობრივის ორგანიზატორი. დღეს მორჩა და მერე რას იზამენ, არ ვიცი. ხმის ნიმუში გვინდაო და არ მოგცემთ-მეთქი და მაგით დამთავრდა", - თქვა ჯაფარიძემ და დაამატა, რომ არ გამორიცხავს დაკავებასაც: "მაგ სტადიაში არიან, რომ ყველაფერი შეიძლება მოხდეს." შსს-ის კრიმინალურმა პოლიციამ ზურაბ ჯაფარიძე რამდენიმე დღის წინ დაიბარა გამოკითხვაზე. როგორც ოპოზიციონერი ჰყვება, იგი "აქციებთან დაკავშირებით" დაიბარეს. მან მოსამართლის თანდასწრებით გამოკითხვა მოითხოვა. ასევე ნახეთ "ჩვეულებრივი სახელმწიფო ტერორია" - შსს აქციის მონაწილეებს იბარებს რადიო თავისუფლებასთან საუბარში მაშინ ზურაბ ჯაფარიძემ თქვა, რომ ეს არის "ჩვეულებრივი სახელმწიფო ტერორი", რათა ადამიანები ქუჩაში აღარ გამოვიდნენ გასაპროტესტებლად: "ჩვეულებრივი სახელმწიფო ტერორია, რომელსაც, ერთის მხრივ, ფორმიანი ადამიანები ახორციელებენ და გამოიხატება აქციის მონაწილეების გატაცებით და მათზე ფიზიკური ანგარიშსწორებით, მეორეს მხრივ, არიან ზონდერჯგუფები, რომლებიც ადამიანებს უსაფრდებიან ღამით... სახელმწიფო ტერორია ზუსტად ისე, როგორც რუსეთში. აშინებენ ადამიანებს, რომ აღარ გამოვიდნენ და აღარ გააპროტესტონ." 2024 წლის 14 მაისს პარლამენტმა, მრავალათასიანი საპროტესტო დემონსტრაციების მიუხედავად, „აგენტების კანონი“ მესამე მოსმენით მიიღო. კანონპროექტის მიღების წინააღმდეგ საქართველოს რეგიონებსა და დედაქალაქში თვეზე მეტია ფართომასშტაბიანი საპროტესტო აქციები იმართება. მათში ათასობით ახალგაზრდა მონაწილეობს. სტუდენტების დიდი ნაწილი კი გაფიცულია. ასევე ნახეთ 180 დაკავებულიდან 93 პოლიციის მხრიდან არასათანადო მ...