ევროკავშირის ელჩები ადამიანის უფლებების დარღვევასთან დაკავშირებით რუსეთის წინააღმდეგ სანქციების ახალ რეჟიმზე თანხმდებიან, - ამის შესახებ იუწყება რადიო თავისუფლების კორესპონდენტი ბრიუსელში. ახალ სანქციებს რუსი ოპოზიციონერი პოლიტიკოსის, რუსეთის სასჯელაღსრულების კოლონიაში თებერვალში გარდაცვლილი ალექსეი ნავალნის სახელი მიენიჭება. ეს იქნება ცალკე სანქციების რეჟიმი, რადგან ადრე ევროკავშირმა მიიღო სანქციები უკრაინაში რუსეთის აგრესიასთან და ყირიმის ანექსიასთან დაკავშირებით. სანქციების სიის პროექტში, რომელსაც რადიო თავისუფლება გაეცნო, ნახსენებია 19 ადამიანი და ერთი დაწესებულება. ესენი არიან ძირითადად რუსეთის ადგილობრივი, სააპელაციო და უზენაესი სასამართლოების მოსამართლეები, რომლებიც სხვადასხვა წლებში ალექსეი ნავალნის გასამართლებაში იღებდნენ მონაწილეობას. ასევე ლაპარაკია რამდენიმე მოსამართლეზე, რომლებმაც სხვა რუსი ოპოზიციონერები და აქტივისტები გაასამართლეს. სიაში ასევე შედიან რუსეთის საგამოძიებო კომიტეტის გამომძიებლები და სახელმწიფო პროკურორი. „ნავალნის სიაში“ შეტანილი რუსი მოხელეების აქტივები ევროკავშირში გაიყინება და მათ აეკრძალებათ ევროკავშირში შესვლა. სიაში მოხვდა ერთი უწყება - რუსეთის ფედერალური პენიტენციური სამსახური. ევროკავშირის მიერ სანქციების ახალი რეჟიმის შემოღების კიდევ ერთ საფუძვლად იქცა 25 წლით თავისუფლების აღკვეთა კრემლის ღია კრიტიკოს ვლადიმირ კარა-მურზასთვის, რომელთან ერთად რუსეთის ციხეში არიან რეჟიმის კრიტიკოსი სხვა პოლიტპატიმრებიც. ასევე ნახეთ ამერიკელი კანონმდებლები გამოდიან რუსი ოპოზიციონერის, კარა-მურზას გათავისუფლების მოწოდებით კრემლის კრიტიკოსი პოლიტიკოსი და ანტიკორუფციონერი ალექსეი ნავალნი 16 თებერვალს გარდაიცვალა საგანგებო რეჟიმის კოლონია "პოლარულ მგელში". მისი სიკვდილის შესახებ დასკვნაში ნათქვამია, რომ პოლიტიკოსი გარდაიცვალა ბუნებრივი მიზეზებით. პოლიტიკოსის მომხრეები მიიჩნევენ, რომ ის მოკლეს. ნავალნის გარდაცვალების შემდეგ, რუსეთის ქალაქებში და საზღვარგარეთ მისი ხსოვნისადმი მიძღვნილი მრავალრიცხოვანი აქციები მოეწყო. პოლიტიკოსის დაკრძალვაზე მოსკოვში 16 ათასზე მეტი ადამიანი მივიდა. ასევე ნახეთ ნავალნის სიკვდილისთვის ევროკავშირმა რუსეთის 35 იურიდიულ და ფიზიკურ პირს დაუწესა სანქციები ევროკავშირმა რუსეთის სასჯელაღსრულების კოლონიაში ალექსეი ნავალნის მოულოდნელ გარდაცვალებასთან დაკავშირებით 33 პირისა და ორი ორგანიზაციის წინააღმდეგ დააწესა სანქციები. მათი სია ევროკავშირის ოფიციალურ ბიულეტენშია გამოქვეყნებული. საბჭოს განცხადების თანახმად, სანქციები დაწესდა მაგნიტსკის ე.წ. ევროპული აქტის მექანიზმის გამოყენებით, რომლის მიხედვითაც, სანქციების ადრესატები საზღვარგარეთ ადამიანის უფლებების უხეშ დარღვევაში მონაწილე პირები არიან. ...