უკრაინის შეიარაღებული ძალების გენერალური შტაბის ცნობით, უკრაინელმა სამხედროებმა დონეცკის ქალაქ პოკროვსკის მიმართულებით რუსული მოიერიშე სამხედრო თვითმფრინავი სუ-25 ჩამოაგდეს. შტაბის ინფორმაციით, ამ ტერიტორიაზე დღის განმავლობაში რუსეთის თავდასხმების რაოდენობა 25-მდე გაიზარდა. წინასწარი ანგარიშის მიხედვით, 19:00 საათისთვის ცნობილი იყო 11 საბრძოლო შეტაკების შესახებ. "მტერი მოიერიშე ჯგუფებისა და ტექნიკის მხარდაჭერით ცდილობს გაარღვიოს ჩვენი საბრძოლო განლაგება. სიტუაცია კვლავ დაძაბულია - გრძელდება სამხედრო შეტაკება ცხრა მიმართულებაზე. არსებული ინფორმაციით, უკრაინელმა ჯარისკაცებმა რუსული სუ-25 მოიერიშე თვითმფრინავი გაანადგურეს", - ნათქვამია უკრაინის შეიარაღებული ძალების გენშტაბის ანგარიშში. უკრაინის შეიარაღებული ძალების გენერალური შტაბის ინფორმაციით, 22 მაისის დილის მონაცემებით, რუსეთმა უკრაინის წინააღმდეგ ომში 354 თვითმფრინავი დაკარგა. მოსკოვი და კიევი საკუთარ სამხედრო დანაკარგებს არ ამჟღავნებენ. ასევე ნახეთ სულ მცირე 53,5 ათასი რუსი ჯარისკაცი დაიღუპა უკრაინასთან ომში - ახალი დამოუკიდებელი ანგარიში ...