რუსეთის პრეზიდენტმა ვლადიმირ პუტინმა დაუშვა აშშ-ის, ამერიკის მოქალაქეების, რეზიდენტების, უპირატესად ამერიკის ბაზარზე მომუშავე კომპანიებისა და მათი კუთვნილი კომპანიების ქონების კონფისკაცია რუსული აქტივების კომპენსაციისთვის. შესაბამისი ბრძანებულება ხუთშაბათს გამოქვეყნდა. ბრძანებულება რუსეთის კომპანიებსა და კერძო პირებს უფლებას აძლევს, რუსეთის სასამართლოებს მიმართონ და მოითხოვონ, რომ უსაფუძვლოდ იქნეს ცნობილი ქონების ჩამორთმევა აშშ-ის სასამართლოების ან სახელმწიფო ორგანოების გადაწყვეტილებით. თუკი რუსეთის სასამართლო აღიარებს, რომ კონფისკაცია უსაფუძვლო იყო, სპეციალურმა სამთავრობო კომისიამ კომპენსაციის სახით უნდა წარმოადგინოს რუსეთის ტერიტორიაზე გამონახული აქტივები, რომლებიც აშშ-სთან არის დაკავშირებული. პუტინის ბრძანებულება უფლებას იძლევა, დააყადაღონ რუსეთის ტერიტორიაზე აშშ-ის ან ამერიკის რეზიდენტებისა და მოქალაქეების უძრავი ქონება, ფასიანი ქაღალდები, წილები რუსეთის კომპანიებში, ქონებრივი უფლებები. დოკუმენტში ნათქვამია, რომ ის შედგენილია რუსეთისა და რუსეთის ცენტრალური ბანკის წინააღმდეგ აშშ-ის „არამეგობრული და საერთაშორისო სამართლის საპირისპირო“ ქმედებების გამო. ასევე ნახეთ EU განიხილავს გაყინული რუსული აქტივების გამოყენებას უკრაინისთვის ზარალის ანაზღაურების გარანტიად 24 აპრილს აშშ-ის პრეზიდენტმა ჯო ბაიდენმა ხელი მოაწერა კონგრესის ორივე პალატის მიერ მიღებულ კანონს, რომელიც უკრაინისთვის სამხედრო დახმარების ახალი პაკეტის გადაცემას ითვალისწინებს. კანონპროექტის ერთ-ერთი პუნქტით შესაძლებელი ხდება უკრაინის სასარგებლოდ რუსეთის იმ სახელმწიფო აქტივების დაყადაღება და კონფისკაცია, რომლებზეც აშშ-ის იურისდიქცია ვრცელდება. 2022 წლის დეკემბერში სენატმა უფლება გასცა, უკრაინის დასახმარებლად გამოყენებულ იქნეს აქტივები, რომლებიც რუს ოლიგარქებს ჩამოერთვათ აშშ-ის კანონმდებლობის დარღვევისთვის (ბაიდენმა ამ დოკუმენტსაც 2024 წელს მოაწერა ხელი). შესწორებების ავტორები არაერთხელ აღნიშნავდნენ, რომ მოსკოვმა უნდა ზღოს უკრაინის წინააღმდეგ აგრესია, მათ შორის - გადაიხადოს მისი აღდგენის ხარჯები. თებერვლის მდგომარეობით, ომით მიყენებული ზარალი 486 მილიარდი დოლარით იყო შეფასებული. ...