ევროკომისარ ოლივერ ვარჰეის განმარტების შემდეგაც, კულტურის მინისტრი თეა წულუკიანი ამბობს, რომ კონტექსტის მიუხედავად, პრემიერ ირაკლი კობახიძესთან საუბრისას სლოვაკეთის პრემიერის ხსენება "ნამდვილად აღიქმება მუქარად". ამის შესახებ მან ტელეკომპანია "იმედის" ეთერში ილაპარაკა. "მისასალმებელია ბატონი ვარჰეის საპასუხო განცხადება და განმარტება. ჩვენც და მთელს საზოგადოებას გვქონდა მოლოდინი, რომ ნათელი მოეფინებოდა თვითონ სიტყვების ავტორის მიერ ამ ყოველივეს. ვერ გამოვრიცხავთ, რომ ეს იყო არა რაიმე ტიპის განზრახვა მუქარასთან დაკავშირებით, არამედ, ქართულად რომ ვიტყვით ხოლმე, სიტყვის მასალად გამაფრთხილებელი ფორმით გაკეთებული და მაგალითად მოყვანილი, როგორც ამას თავად კომისარი ამტკიცებს. ეს ის კომისარია, რომელიც ძალიან ხშირად დახმარებია საქართველოს ევროკავშირის სტრუქტურებში, ხელშემწყობი პოზიცია ჰქონია. რაც არ უნდა ყოფილიყო კონტექსტი, ნებისმიერ შემთხვევაში და ვერავინ იტყვის საწინააღმდეგოს, ეს ნამდვილად აღიქმება მუქარად მის მიერ, ვინც ამას ისმენს", - თქვა წულუკიანმა. 23 მაისს ევროკომისარმა ოლივერ ვარჰეიმ უპასუხა მუქარის შესახებ საქართველოს პრემიერ-მინისტრის, ირაკლი კობახიძის განცხადებას - იგი წუხილს გამოთქვამს იმის გამო, რომ მისი სატელეფონო ზარის ერთი ნაწილი მთლიანად ამოიღეს კონტექსტიდან. "მინდა გამოვხატო გულწრფელი მწუხარება, რომ ჩემი სატელეფონო საუბრის გარკვეული ნაწილი კონტექსტიდან ამოღებულია", - წერს ვარჰეი და განმარტავს, რომ როგორც სამეზობლო და გაფართოების საკითხებზე პასუხისმგებელი კომისარი, იგი რეგულარულ კონტაქტზეა ხოლმე თავისი პორტფელის ქვეყნების მთავრობის წარმომადგენლებთან. "საქართველოს ამჟამინდელ პოლიტიკურ ვითარებაში მე დიდ ძალისხმევას ვდებდი, პოლიტიკური ხელმძღვანელობა დამერწმუნებინა, რომ კანონმა "უცხოური გავლენის გამჭვირვალობის შესახებ", შეიძლება შეარყიოს საქართველოს ევროკავშირის გზა. რამდენადაც კარგად ვიცი ქართული საზოგადოების ძალიან ძლიერი პროევროპული განწყობის შესახებ, ჩემი სატელეფონო საუბრისას საჭიროდ ჩავთვალე, პრემიერის ყურადღება მიმექცია იმაზე, რომ ამ კანონის მიღებით არ გამწვავებულიყო ისედაც მყიფე ვითარება, რამაც შეიძლება გამოიწვიოს შემდგომი პოლარიზაცია და თბილისის ქუჩებში შესაძლო უკონტროლო სიტუაციები. ამასთან დაკავშირებით, სლოვაკეთის ბოლო ტრაგიკული მოვლენა იქნა მოყვანილი, როგორც მაგალითი და მითითება იმისა, თუ სად შეიძლება მიგვიყვანოს პოლარიზაციის ასეთმა მაღალმა დონემ საზოგადოებაში, თუნდაც ევროპაში", - წერია ევროკომისრის განცხადებაში. 23 მაისს საქართველოს პრემიერ-მინისტრმა ირაკლი კობახიძემ ფეისბუკის ოფიციალურ გვერდზე დაწერა, რომ ერთ-ერთი ევროკომისარი მას დაემუქრა. მისი განცხადებით, ეს უკავშირდება „აგენტ...