პარლამენტის იურიდიულ საკითხთა კომიტეტის სხდომაზე ე.წ. აგენტების კანონის შესახებ პრეზიდენტის ვეტო განიხილეს. საპარლამენტო პოლიტიკური ჯგუფის, „საქართველოსთვის“ წევრმა მიხეილ დაუშვილმა მომხსენებელს, პრეზიდენტის საპარლამენტო მდივანს, გიორგი მსხილაძეს ჰკითხა: კანონის მიღების შემთხვევაში, საქართველოს შესაძლოა, დაემუქროს საერთაშორისო იზოლაცია და ეს იქნება თუ არა საფრთხე არაღიარების პოლიტიკისთვის? „ფაქტობრივად, ჩვენი ყველა მეგობარი სახელმწიფო, ჩვენი პარტნიორი სახელმწიფოები ღიად აფიქსირებენ თავიანთ პოზიციას ამ კანონპროექტთან დაკავშირებით. მათ შორის ისიც უკვე თვალსაჩინოა, რომ იქმნება ჩვენი ქვეყნის საერთაშორისო იზოლაციის სერიოზული საფრთხე. იმის გათვალისწინებით, რომ დღეისათვის ოკუპირებული ტერიტორიების არაღიარების პოლიტიკა პირდაპირ არის დაკავშირებული და, ფაქტობრივად, ჩვენი მოკავშირე სახელმწიფოები არიან ამ არაღიარების პოლიტიკის მთავარი გარანტორები, თქვენი აზრით, ამ კანონით და იმ ქმედებებით, რასაც „ოცნება“ ახორციელებს, მათ შორის მოქალაქეების მიმართ ტოტალური ძალადობით და ტერორით, ექმნება თუ არა საფრთხე არაღიარების პოლიტიკას? იმ შემთხვევაში, თუ ქვეყანა მოექცევა საერთაშორისო იზოლაციაში, როგორ ფიქრობთ, არაღიარების პოლიტიკის კუთხით რა რისკები შეიძლება დაუდგეს ჩვენს ქვეყანას?“ - ჰკითხა დაუშვილმა პრეზიდენტის საპარლამენტო მდივანს. დაუშვილის შეკითხვას საპარლამენტო უმრავლესობის წევრების მხრიდან მწვავე რეაქცია მოჰყვა. კომიტეტის თავმჯდომარემ ანრი ოხანაშვილმა ოპოზიციის დეპუტატს ამ შეკითხვის გამო ბოდიშის მოხდისკენ მოუწოდა. „ქვეყნის სუვერენიტეტისა და ტერიტორიული მთლიანობის კუთხით, ძალიან მძიმე განცხადება გააკეთეთ ახლა და იქნებ განმარტოთ... ვინმეს აღიარებაზე არის დამოკიდებული ჩვენი ტერიტორიები, ისტორიული მიწა-წყალი?! ცოტა დაფიქრდით, რა განცხადებას აკეთებთ, ხალხო... როგორ შეიძლება ასეთი შეკითხვის დასმა?! ... რას გვეუბნებით, რომ ტერიტორიული მთლიანობისადმი მხარდაჭერა დამოკიდებულია კონკრეტულ გამჭვირვალობის საკითხზე?“ - თქვა ოხანაშვილმა. დაუშვილმა ბოდიშის მოხდაზე უარი განაცხადა და განაგრძო: „თუ რეალიზდა საერთაშორისო იზოლაციის საფრთხე, კითხვა არის შემდეგი: ოკუპირებული ტერიტორიების არაღიარების ნაწილში ამ კუთხით პასუხისმგებელი ვინ არის?... ქვეყნის საერთაშორისო იზოლაციაში მოქცევა უდიდესი რისკია ჩვენი ქვეყნისთვის. ჩვენი მეგობრების გარეშე ჩვენ დაცული ვერ ვიქნებით. ამიტომ არის მნიშვნელოვანი, რომ არ დავუშვათ საერთაშორისო იზოლაციაში მოქცევა.“ საკითხის სენსიტიურობიდან გამომდინარე, პრეზიდენტის საპარლამენტო მდივანმა გიორგი მსხილაძემ დაუშვილის შეკითხვაზე პასუხის გაცემისგან თავი შეიკავა. ასევე ნახეთ იურიდიულმა კომიტეტმა „აგენტების კანონზე“ ვეტოს დაძლევას მხარი დაუჭირა საქართველოს პარლ...