ბიზნესმენი, "ვისოლ ჯგუფის" დამფუძნებელი სოსო ფხაკაძე სოციალურ ქსელში „აგენტების კანონთან“ დაკავშირებით განცხადებას ავრცელეს. ფხაკაძე საქართველოს ხელისუფლებას შექმნილი ვითარებიდან ორ გამოსავალს სთავაზობს: კანონთან დაკავშირებული ვეტოს განხილვის გადადებას, კანონის ამოქმედების ვადად 2025 წლის პირველი იანვრის განსაზღვრას. ფხაკაძე წერს, რომ როგორც ბიზნესმენი, რომელიც ეყრდნობა არსებული ვითარების ანალიზს, თავს ვალდებულად მიიჩნევს, გამოეხმაუროს ქვეყანაში მიმდინარე მოვლენებს. „ხაზგასმით და ერთმნიშვნელოვნად ვაფიქსირებ ჩემს ურყევ პოზიციას ქვეყნის ევროპული და ევროატლანტიკური კურსის ერთგულებისა და ამ კურსის უალტერნატივობის შესახებ“, - წერს სოსო ფხაკაძე და გამოსავლის ორ გზაზე საუბრობს. „პირველი, ხვალ ხელისუფლებამ გადადოს ვეტოს განხილვა; ავიღოთ გარკვეული პერიოდი და ეს დრო გამოვიყენოთ ჩვენს სტრატეგიულ პარტნიორებთან შემდგომი კონსულტაციებისთვის, რომ არ დაზიანდეს ქვეყნის კონსტიტუციით გარანტირებული საგარეო პოლიტიკური კურსი. ან მეორე ოფცია, არსებული სამართლებრივი ინსტრუმენტებისა და კანონში ცვლილების განხორციელების გზით, კანონის ამოქმედების ვადად განისაზღვროს 2025 წლის დასაწყისი, ვთქვათ, 1 იანვარი. ამ შემთხვევაში, საპარლამენტო არჩევნების შედეგები იქნებოდა განმსაზღვრელი, თუ რამდენად მისაღებია ეს კანონი ჩვენი მოსახლეობისთვის“, - ნათქვამია სოსო ფხაკაძის განცხადებაში. სოსო ფხაკაძე საქართველოს ბიზნესასოციაციის თავმჯდომარეა. ეს არ არის პირველი წერილი, რომელსაც ბიზნესმენი სოსო ფხაკაძე "აგენტების კანონის" ინიციირების შემდეგ ქვეყანაში არსებულ მდგომარეობასთან დაკავშირებით აქვეყნებს. მანამდე გამოქვეყნებული კიდევ ერთი წერილი "აგენტების კანონის" მოწინააღმდეგეებმა ორაზროვნად მიიჩნიეს და პროტესტიც გამოუცხადეს მის ბიზნესს. დღეს, 27 მაისს, საქართველოს პარლამენტის იურიდიულ საკითხთა კომიტეტმა მხარი დაუჭირა „აგენტების კანონზე“ პრეზიდენტის ვეტოს დაძლევას. 14 მაისს ხალხმრავალი პროტესტისა და უცხოელი პარტნიორების მოწოდების მიუხედავად, პარლამენტმა მესამე მოსმენით მიიღო „აგენტების კანონი“, 18 მაისს კი მას პრეზიდენტმა ვეტო დაადო და კიდევ ერთხელ უწოდა „რუსული კანონი“. კანონის წინააღმდეგ საქართველოში მრავალათასიანი საპროტესტო გამოსვლებისა და დასავლეთიდან მოწოდებების, ასევე ვენეციის კომისიის კრიტიკული დასკვნის მიუხედავად, „ქართული ოცნება” არ აპირებს, უარი თქვას კანონზე. პარლამენტი, რომელშიც უმრავლესობას „ქართული ოცნება“ ფლობს, სამშაბათს, 28 მაისს დანიშნულ პლენარულ სესიაზე გეგმავს ვეტოს დაძლევას. ...