"ნაციონალური მოძრაობა" „აგენტების კანონზე“ პრეზიდენტის ვეტოს დაძლევამდე პარლამენტის პლენარულ დარბაზს ტოვებს. ამის შესახებ განცხადება პარლამენტის ტრიბუნიდან სიტყვით გამოსვლისას გააკეთა "ნაციონალური მოძრაობის" წევრმა თინათინ ბოკუჩავამ: „დღეს შავი და თეთრია არჩევანი, ევროპა თუ რუსეთი, თავისუფლება თუ მონობა, სინათლე თუ სიბნელე, ღირსება თუ ღალატი, და მოგიწოდებთ, რომ გამოიყენოთ ბოლო შანსი იმისთვის, რომ აირჩიოთ ქვეყნის ერთგულება, აირჩიოთ სინათლე, აირჩიოთ სიმართლე, ევროპა, იმიტომ რომ ძალა ევროპაშია, ძალა ერთობაშია, ჩვენია ეს ქვეყანა“. ჩვენ ახლა დავტოვებთ პლენარულ სხდომათა დარბაზს და შევუერთდებით საქართველოს მოქალაქეებს, რომლებიც იცავენ ჩვენი ქვეყნის ღირსებას და იცავენ ჩვენი ქვეყნის ეროვნულ და ევროპულ ინტერესებს“, - თქვა მან. პარლამენტში თითქმის შვიდი საათია მიმდინარეობს სხდომა, რომელზეც „უცხოური გავლენის გამჭვირვალობის შესახებ” კანონზე პრეზიდენტის მოტივირებულ შენიშვნებს განიხილავენ. პარალელურად, საპროტესტო აქცია მიმდინარეობს პარლამენტის წინ. გადაკეტილია რუსთაველის გამზირი. 27 მაისს საქართველოს პარლამენტის იურიდიულ საკითხთა კომიტეტმა მხარი დაუჭირა „აგენტების კანონზე“ პრეზიდენტის ვეტოს დაძლევას. კომიტეტის წევრთა უმრავლესობა მმართველი პარტიის, „ქართული ოცნების“ წევრია. 40 დღეზე მეტია საქართველოში „აგენტების კანონის“ წინააღმდეგ საპროტესტო აქციები მიმდინარეობს, მათ შორის, რამდენჯერმე გაიმართა მრავალათასიანი საპროტესტო აქცია-მსვლელობა. 3 აპრილს „უცხოეთის აგენტების“ შესახებ კანონპროექტის ხელახალ ინიციირებას საზოგადოების პროტესტი მოჰყვა. მმართველმა პარტიამ, „ქართულმა ოცნებამ“, ხალხმრავალი აქციების მიუხედავად, 14 მაისს მას მესამე მოსმენით დაუჭირა მხარი. კანონპროექტის მიხედვით, „უცხოური ძალის ინტერესების გამტარებელ ორგანიზაციად“ დარეგისტრირება მოუწევთ იმ მედია და არასამთავრობო ორგანიზაციებს, რომლებიც საქართველოს პარტნიორი ქვეყნებიდან იღებენ დაფინანსებას. გასულ წელს ინიციირებული კანონპროექტით, მათი აგენტებად რეგისტრაცია იყო გათვალისწინებული, ერთი წლის შემდეგ ხელახლა წარდგენილ კანონპროექტში კი საპარლამენტო უმრავლესობამ მხოლოდ ორგანიზაციების სარეგისტრაციო სიის სახელდება შეცვალა. 23 მაისს აშშ-ის სახელმწიფო მდივანმა ენტონი ბლინკენმა გამოაქვეყნა გადაწყვეტილება: „საქართველოში დემოკრატიისთვის ძირის გამოთხრის გამო სავიზო შეზღუდვების პოლიტიკის გამოცხადება და აშშ-საქართველოს თანამშრომლობის ყოვლისმომცველი გადახედვა”. ვაშინგტონმა გადაწყვიტა, რომ სავიზო შეზღუდვებს დაუწესებს „ქართული ოცნების" ხელისუფლების წარმომადგენლებს, რომლებიც დემოკრატიას ძირს უთხრიან, და მათი ოჯახის წევრებსაც. ჯერჯერობით არცერთი კონკრეტული პირი დასახელებული არ არის. გარდა ამისა, აშშ გადახედა...