ჰააგაში ადგილობრივმა ხელისუფლებამ უარი უთხრა აქტივისტებს, რომლებსაც სურდათ, რუსი ოპოზიციონერი პოლიტიკოსის, ალექსეი ნავალნის პატივსაცემად, ერთ-ერთი ქუჩისათვის მისი სახელი ეწოდებინათ. ამის შესახებ The Insider-ი იუწყება, ნიდერლანდში ნავალნის გუნდის წარმომადგენელ სერგეი გორბუნოვზე დაყრდნობით. გამოცემის თანახმად, აქტივისტებს სურდათ, რომ სახელი გადარქმეოდა ანდრიეს ბიკერვეგის ქუჩას, რომელზეც რუსეთის საელჩო მდებარეობს და მისთვის ეწოდებინათ ალექსეი ნავალნის სახელი. მათ ინტერნეტპლატფორმაზე შესაბამისი პეტიციის ქვემოთ 85 ათასზე მეტი ხელმოწერა შეაგროვეს იმ აქციის ფარგლებში, რომლის ორგანიზატორი იყო ჰოლანდიელი აქტივისტი ლიზ ჰოლმანი. ჰააგის საქალაქო საბჭოსგან მათ მიიღეს პასუხი, რომ სახელის შეცვლა სირთულეებს გამოიწვევდა, რადგან მითითებულ ქუჩაზე მხოლოდ რუსეთის საელჩო არ მდებარეობს. გარდა ამისა, სახელის გადარქმევა მხოლოდ "უკიდურესი აუცილებლობის შემთხვევაშია“ შესაძლებელი. ამასთანავე, საბჭომ აღნიშნა, რომ ქუჩის სახელის შესაცვლელად აუცილებელია, რომ ადამიანის გარდაცვალებიდან მინიმუმ ათი წელი გავიდეს, რადგან "მისი ცხოვრების ისტორია ყურადღებით უნდა იქნას შესწავლილი". თუმცა აქტივისტები იმედოვნებენ, რომ ხელისუფლება გადაწყვეტილებას შეცვლის. ქუჩის სახელის გადარქმევის მხარდასაჭერად, ნავალნის დაბადების დღეს, 4 ივნისს, ისინი მსვლელობას გეგმავენ. ოპოზიციონერი პოლიტიკოსი ალექსეი ნავალნი 16 თებერვალს გარდაიცვალა საგანგებო რეჟიმის კოლონია „პოლიარნი ვოლკში“. მისი სიკვდილის თაობაზე დასკვნაში ნათქვამია, რომ პოლიტიკოსი ბუნებრივი მიზეზებით მოკვდა. სიკვდილამდე რამდენიმე დღით ადრე ნავალნი 27-ედ მოათავსეს სადამსჯელო საკანში - კიდევ უფრო მძიმე პირობებში, ვიდრე მანამდე. პოლიტიკოსის მომხრეები მიიჩნევენ, რომ ის მოკლეს. ნავალნის მეუღლემ, იულიამ, პირობა დადო, რომ ქმრის საქმეს გააგრძელებს. ასევე ნახეთ ევროპის პარლამენტმა პუტინს დააკისრა ალექსეი ნავალნის სიკვდილისთვის პასუხისმგებლობა 29 თებერვალს ევროპის პარლამენტმა ალექსეი ნავალნის სიკვდილთან დაკავშირებით რეზოლუცია მიიღო. მასში რუსი ოპოზიციონერი პოლიტიკოსის სიკვდილს ეწოდება „მკვლელობა“, რომლისთვისაც „სისხლის სამართლისა და პოლიტიკური პასუხისმგებლობა“ პირადად რუსეთის პრეზიდენტ ვლადიმირ პუტინს ეკისრება. 547 დეპუტატიდან რეზოლუციას 506-მა დაუჭირა მხარი. ...