31 მაისს რუსეთში, ყაზანის რაიონულმა სასამართლომ დააკმაყოფილა გამოძიების თხოვნა და 5 აგვისტომდე გაუგრძელა პატიმრობა რადიო თავისუფლების თათრულ-ბაშკირული სამსახურის ჟურნალისტს, ალსუ კურმაშევას. ამ ცნობას სასამართლოს პრესსამსახურზე დაყრდნობით SOTA ავრცელებს. ჟურნალისტის ადვოკატები ითხოვდნენ აღკვეთის ღონისძიების შინაპატიმრობით შეცვლას, თუმცა სასამართლომ ამაზე უარი განაცხადა. ალსუ კურმაშევა უკვე შვიდ თვეზე მეტია, პატიმრობაში იმყოფება - გასული წლის 18 ოქტომბრის შემდეგ. Idel.Реалии-ის ცნობით, 31 მაისის სხდომას ესწრებოდნენ ავსტრალიის და ჩეხეთის საელჩოების წარმომადგენლები, სხდომა დახურულ რეჟიმში მიმდინარეობდა. პრესა და დიპლომატიური მისიების წარმომადგენლები სასამართლოს დარბაზში დაუშვეს მას მერე, რაც მოსამართლეები გადაწყვეტილების გამოსატანად სხვა ოთახში გავიდნენ. გამოცემა SotaVision-ი წერს, რომ ალსუ კურმაშევას მდგომარეობა, მისივე სიტყვებით, სტაბილურად უარესდება. კურმაშევას თქმით, მას აქვს დიაგნოზები, რომელთა ფონზეც ჯანმრთელობის გაუმჯობესება შეუძლებელია. "შეიძლება მხოლოდ იმის შენარჩუნება, რაც არის", - ამბობს კურმაშევა და აცხადებს, რომ მას სამედიცინო ჩარევა ესაჭიროება. კურმაშევას თქმით, თავისი შვილების ხმები ბოლოს 2023 წლის ოქტომბერში მოისმინა. მას არ აქვს სატელეფონო ზარების უფლება. რადიო თავისუფალი ევროპა/რადიო თავისუფლების პრეზიდენტმა სტივენ კაპუსმა სასამართლოს გადაწყვეტილების გამოცხადების შემდეგ თქვა, რომ "ამ აზრსმოკლებულ, სასტიკ დევნაში ყოველდღიურად იზრდება უსამართლობა". "რუსეთის ხელისუფლება, რომელსაც [კურმაშევა] უკვე 227 დღეა პატიმრობაში ჰყავს, ალსუს, როგორც ამერიკის მოქალაქეს, ართმევს საბაზისო უფლებებს. ამ დროის განმავლობაში ალსუს არ ჰქონია არცერთი სატელეფონო საუბარი შვილებთან და ქმართან, რომლებსაც ის უყვართ; მას უარს ეუბნებიან აშშ-ის საკონსულოსთან წვდომაზე, ასევე - სამედიცინო მომსახურების საბაზისო, ადეკვატურ დონეზე. ალსუ სახლში უნდა იყოს, პრაღაში, თავის ქალიშვილებთან ერთად, მათ უნდა ეხმარებოდეს გამოსაშვები გამოცდებისთვის - და არა რუსეთის ციხეში, უსაფუძვლო ბრალდებებით", - ამბობს კაპუსი. კურმაშევა, რომელსაც ორმაგი, რუსეთის და აშშ-ის მოქალაქეობა აქვს, რუსეთის სისხლის სამართლის კოდექსის ორი მუხლითაა ბრალდებული: "რუსეთის ფედერაციის კანონმდებლობით დადგენილი ვალდებულების დარღვევაში შესაბამის ორგანოში წარმოედგინა დოკუმენტები, რომლებიც უცხოეთის აგენტების რეესტრში შესაყვანად იყო აუცილებელი" და "პოლიტიკური სიძულვილის მოტივაციით არმიის შესახებ ფეიკების გავრცელებაში". ასევე ნახეთ ალსუ კურმაშევა ყაზანის ციხიდან: "მინდა აქედან ცოცხალი და ჯანმრთელი გამოვიდე" ...