UFC-ის ყოფილი ჩემპიონი დაღესტნიდან ხაბიბ ნურმაგომედოვი დონალდ ტრამპთან შეხვედრისთვის გააკრიტიკა რუსეთის ადამიანის უფლებათა საპრეზიდენტო საბჭოს წევრმა და 2024 წლის არჩევნებში ვლადიმირ პუტინის ნდობით აღჭურვილმა პირმა მარინა ახმედოვამ. ამ შეხვედრაზე, რომელიც ნიუარკში 2 ივნისს, UFC-ის საჩემპიონო ორთაბრძოლების დროს გაიმართა, ყოფილმა ჩემპიონმა ხაბიბ ნურმაგომედოვმა აშშ-ის ყოფილ პრეზიდენტს ღაზის სექტორში ომის შეჩერება სთხოვა. "და მას (ნურმაგომედოვს) საერთოდ არ აინტერესებს, რომ ამერიკა ომშია თავის ქვეყანასთან, რუსეთთან. ნურმაგომედოვს არ აინტერესებს, რა ხდება ბელგოროდის რეგიონში. მხოლოდ პალესტინაზე ფიქრობს, რადგან იქ მუსლიმი ძმები არიან და ბელგოროდში - ურწმუნოები", - წერს ახმედოვა თავის ტელეგრამის არხში. ახმედოვამ გაიხსენა ასევე ის ფაქტი, რომ გასული წლის ოქტომბერში, ისრაელის საწინააღმდეგო პროტესტის დროს, ნურმაგომედოვმა მხარი დაუჭირა მაჰაჩყალის აეროპორტის დაკავებას. "ვინ არის ნურმაგომედოვი, დაღესტნის ახალგაზრდობის გმირი? რა თქვა ოდესმე ჭკვიანური? არაფერი! მებრალება ნურმაგომედოვი. ეგეც არის რა გმირი, რომლის გამო ახალგაზრდები აეროპორტში დარბიან და თვითმფრინავის ძრავაში ებრაელებს ეძებდნენ“, - განაცხადა მარინა ახმედოვამ. 2023 წლის 29 ოქტომბრის საღამოს, მაჰაჩყალის აეროპორტი დაიკავა რამდენიმე ასეულმა ადამიანმა, რომლებიც თელ-ავივიდან სატრანზიტო რეისზე მგზავრების პოვნას ცდილობდნენ. ამბოხებულები აპროტესტებდნენ ისრაელის ქმედებებს ღაზის სექტორში და მოითხოვდნენ ებრაელების გაძევებას ამ რეგიონიდან. ნურმაგომედოვმა და აშშ-ის ყოფილმა პრეზიდენტმა ტრამპმა 2 ივნისს ნიუარკში UFC-ის ტურნირზე ისაუბრეს. ამ ტურნირზე ნურმაგომედოვი მხარს უჭერდა თავის თანამემამულეს, დაღესტნელ მებრძოლ ისლამ მახაჩოვს, რომელმაც მსუბუქ წონაში ჩემპიონის ტიტული ამერიკელი დასტინ პორიეს დამარცხებით დაიცვა. მედიის ცნობით, ნურმაგომედოვმა ტრამპს უთხრა: "ვიცი, რომ პალესტინის ომს შეაჩერებთ", რაზეც ტრამპმა უპასუხა: „დიახ, ჩვენ ამას შევაჩერებთ! მე შევაჩერებ ომს, შევაჩერებ!“, - აღნიშნა აშშ-ის ყოფილმა პრეზიდენტმა, რომელიც ცოტა ხნის წინ ნაფიცმა მსაჯულებმა სისხლის სამართლის საქმეში დამნაშავედ ცნეს. რაც შეეხება მარინა ახმედოვას, ცნობილია, რომ იგი 2014 წლიდან აშუქებდა რუსეთის მიერ მხარდაჭერილ ომს დონბასში და საერთაშორისო სანქციებს ექვემდებარება, პროპაგანდის გავრცელებისა და უკრაინის წინააღმდეგ ომის მხარდაჭერისთვის. 2014 წლის 12 აპრილს რუსულმა ჯარმა და ადგილობრივმა კოლაბორაციონისტებმა უკრაინაში, დონეცკის რეგიონში, აიღეს ქალაქები სლავიანსკი, კრამატორსკი და დრუჟკოვკა. მეორე დღეს, უკრაინის პრეზიდენტის მოვალეობის შემსრულებელმა ალექსანდრ ტურჩინოვმა გამოაცხადა, რომ ანტიტერორისტულ ოპერაციას იწყებდა. ასე გაჩაღდა უკ...