გორში დაკავებული ბიზნესმენის, სოსო ბაბაევის ოჯახის წევრებმა, მეგობრებმა და სამოქალაქო აქტივისტებმა გორის პოლიციის სამმართველოსთან საპროტესტო აქცია გამართეს და დაკავებულს სოლიდარობა გამოუცხადეს. დემონსტრანტებს ხელში ეჭირათ ტრანსპარანტები წარწერებით: „სოსო რუსული რეჟიმის პატიმარია“, „თავისუფლება რუსული რეჟიმის უკანონო პატიმარს,“ „არა რუსულ რეჟიმს“. ისინი მიიჩნევენ, რომ ხელისუფლება სოსო ბაბაევს მისი პოზიციის და სამოქალაქო აქტივიზმის გამო სჯის. ბიზნესმენი და სამოქალაქო აქტივისტი სოსო ბაბაევი გორში 4 ივნისის საღამოს დააკავეს. მისი ადვოკატი და ახლობლები ფიქრობენ, რომ ბაბაევი „აგენტების კანონის“ წინააღმდეგ გამართულ აქციებში მონაწილეობის გამო ისჯება. ადვოკატმა კახა კალმახელიძემ ბაბაევი წინასწარი დაკავების იზოლატორში მოინახულა. ბაბაევის ინტერესების დამცველი ამბობს, რომ დაკავებული ნაცემია, ხოლო ავტომატი და პისტოლეტი მანქანაში მას პოლიციამ ჩაუდო. ადვოკატის თქმით, მას დაკავებულმა უთხრა, რომ ჩხრეკის დროს შსს-ს წარმომადგენლები მას ეუბნებოდნენ, რომ ოპოზიციურ პარტიებთან იყო დაკავშირებული, რის გამოც სიტყვიერ შეურაცხყოფას აყენებდნენ. „დაკავებას უკავშირებს პოლიტიკური სახის აქტიურობას. დააკავეს 236-ე მუხლით, რაც გულისხმობს ცეცხლსასროლი იარაღის უკანონო შეძენა-შენახვა-ტარებას, ჩაუდეს პისტოლეტი და ავტომატი. დამსწრე არ დაისწრეს ჩხრეკის დროს, თვითონ განათავსეს ავტომანქანაში, შემდეგ დაიწყეს გადაღება, თითქოს პირველად გაჩხრიკეს. ფიზიკურად გაუსწორდნენ, ტანსაცმელი შემოახიეს, თავზე, სახეზე და ტანზე აქვს დაზიანებები, მოთავსებულია წინასწარი დაკავების იზოლატორში. გაჩერებას, დანებებას არ აპირებს, მტკიცებულება გვაქვს, რომლითაც ჩვენ სიმართლეს დავამტკიცებთ", - ამბობს ადვოკატი კახა კალმახელიძე. სოსო ბაბაევი გორში ფლობს ბარ „ბლექ სთარს“, რომელშიც აშშ-ის მიერ სანქცირებული მოსამართლეების გადახაზული ფოტოები განათავსა და მათ იქ შესვლა აუკრძალა. რესტორნის ღობეზე გამოფენილია საქართველოს, უკრაინისა და ევროკავშირის დროშები. გორი. სოსო ბაბაევის ბარი „ბლექ სთარი“ უკრაინაში რუსეთის შეჭრის შემდეგ, ბაბაევი უკრაინელებისთვის ჰუმანიტარული ტვირთის შეკრებით და ადგილზე ჩატანითაც იყო დაკავებული. ბოლო დროს როგორც თბილისში, ისე გორში „აგენტების კანონის" წინააღმდეგ გამართულ აქციებში იგი აქტიურად მონაწილეობდა. ბაბაევი წინასწარი დაკავების იზოლატორში ახლა ბრალის წარდგენას ელოდება. შინაგან საქმეთა სამინისტროს გამოძიება დაწყებული აქვს სისხლის სამართლის კოდექსის 236-ე მუხლით, რაც იარაღის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გადაზიდვას გულისხმობს და ორ წლამდე თავისუფლების აღკვეთას ითვალისწინებს. ...