საქართველოს სახელმწიფო უსაფრთხოების სამსახურის ცნობით, ტერორისტულ დანაშაულზე მიმდინარე გამოძიების ფარგლებში საქართველოს ორი მოქალაქე დააკავეს. მათ ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვას ედავებიან. განცხადებაში წერია, რომ სპეციალური ოპერაცია ბათუმში ორ ადგილზე ერთდროულად ჩატარდა. სუსი „ისლამური სახელმწიფოს“ კვალზე მიუთითებს. „დაკავებული პირების საცხოვრებელი სახლებიდან ამოღებულია ავტომატური ცეცხლსასროლი იარაღი, პისტოლეტები, ხელყუმბარები, ტერორისტული ორგანიზაცია „ისლამური სახელმწიფოს“ სიმბოლიკიანი დროშები და გამოძიებისთვის მნიშვნელოვანი სხვადასხვა სახის მტკიცებულებები“, - ვკითხულობთ განცხადებაში. სახელმწიფო უსაფრთხოების სამსახურის კონტრტერორისტული ცენტრი გამოძიებას სისხლის სამართლის კოდექსის 236-ე (ცეცხლსასროლი იარაღის უკანონო შეძენა-შენახვა-ტარება) და 328-ე (უცხო ქვეყნის ტერორისტულ ორგანიზაციაში გაერთიანება ან ტერორისტულ საქმიანობაში მისი დახმარება) მუხლებით აწარმოებს, რაც 3-დან 6 წლამდე და 10-დან 17 წლამდე თავისუფლების აღკვეთას ითვალისწინებს. ამასთან, სუსი მიუთითებს, რომ აქტიურად მიმდინარეობს კონტრტერორისტული ღონისძიებები დაკავებული პირების ტერორისტულ ორგანიზაცია „ისლამურ სახელმწიფოსთან“ კავშირების იდენტიფიცირების მიზნით. ტერორისტული ორგანიზაცია „ისლამური სახელმწიფოს“ მხარდამჭერი ექვსი მოქალაქე სახელმწიფო უსაფრთხოების სამსახურმა 2023 წლის 17 მაისს დააკავა. „ისლამური სახელმწიფოს“ ერთ-ერთი დაჯგუფების მეთაურის, საქართველოს მოქალაქის, მალხაზ პაქსაშვილის დაკავების შესახებ კი სახელმწიფო უსაფრთხოების სამსახურმა ცნობა 2023 წლის აპრილში გაავრცელა. ...