5 ივნისს მოლდოვის გენერალურმა პროკურატურამ ქვეყნის ინფორმაციისა და უსაფრთხოების სამსახურისგან (SIB) გამოითხოვა ცნობები, რათა აღიძრას სისხლის სამართლის საქმე მოლდოვის რესპუბლიკის გენერალური შტაბის ყოფილი უფროსის, იგორ გორგანის წინააღმდეგ. The Isider-ის თანახმად, გენერალი გორგანი, რომელიც ორჯერ, 2013-2015 და 2019-2021 წლებში, იყო მოლდოვის შეიარაღებული ძალების გენშტაბის უფროსი, ეჭვმიტანილია რუსეთის სპეცსამსახურებთან თანამშრომლობაში. 5 ივნისს ტელეკომპანია TVR Moldova-სთან კომენტარში, ქვეყნის უშიშროების წარმომადგენლებმა განაცხადეს, რომ მათ ხელთარსებული მონაცემები ადასტურებს Insider-ის ჟურნალისტური გამოძიებით მოპოვებული ინფორმაციის სანდოობას. გამოძიების ავტორები ირწმუნებიან, რომ ხელთ ჩაუვარდათ გორგანსა და რუსეთის სადაზვერვო სამმართველოს შპიონაჟის განყოფილების უფროს, პოლკოვნიკ ალექსანდრ მაკაროვს შორის ტელეგრამის არხით მიმოწერა. ამ მიმოწერით ირკვევა, რომ გენერალი იგორ გორგანი რეგულარულად იუწყებოდა მოლდოვის რესპუბლიკაში არსებულ შიდა პოლიტიკურ ვითარებაზე და გადასცემდა მონაცემებს უკრაინის თავდაცვის სამინისტროს იმ წარმომადგენლების უცხოური ვიზიტების შესახებ, რომლებიც უკრაინის შეიარაღებული ძალებისთვის სამხედრო აღჭურვილობისა და ჭურვების შეძენაზე მუშაობდნენ. რადიო თავისუფლების მოლდოვურ სამსახურს ქვეყნის პროკურატურისა და უშიშროების ანონიმურმა წარმომადგენლებმა უთხრეს, რომ 6 ივნისს მოლდოვის უშიშროების სამსახურის თანამშრომლებმა გენერალურ პროკურატურას პასუხი უნდა გაუგზავნონ, რის შემდეგაც პროკურატურა, სავარაუდოდ, "სამშობლოს ღალატის" (სისხლის სამართლის კოდექსის 337-ე) მუხლით აღძრავს საქმეს. მოლდოვის გენერალური შტაბის ყოფილი უფროსი 2021 წელს, თავდაცვის მინისტრის წარდგინებით, თანამდებობიდან ახალარჩეულმა პრეზიდენტმა მაია სანდუმ გაათავისუფლა. ამის შემდეგ იგორ გორგანი გაეროს მოლდოვის წარმომადგენლობის ოფისში უსაფრთხოების სამსახურს ხელმძღვანელობდა. მის მიმართ დაწყებული სამსახურებრივი გამოძიების ფარგლებში, გორგანი გაეროს ოფისმა დაკავებული თანამდებობიდან უკვე გაათავისუფლა. ასევე ნახეთ ბლინკენის ვიზიტი მოლდოვაში ქვეყნის პროევროპული არჩევანის ძლიერ მხარდაჭერად მიაჩნიათ ასევე ნახეთ მოლდოვის ოპოზიციის ლიდერი გამოდის რუსეთთან და ჩინეთთან კავშირების გაუმჯობესების მოწოდებით ...