წულუკიანი ირწმუნება, რომ საქართველოს ხელისუფლება აშშ-სთან სტრატეგიული პარტნიორობის ერთგულია და მეგობრობაზე უარი არასდროს უთქვამს. "შეიძლება თამამად ითქვას, რომ ეს არის მორიგი შეცდომა, რომელსაც მათ და ჩვენდა სამწუხაროდ, აშშ უშვებს თავის სტრატეგიულ პარტნიორთან ურთიერთობაში. ალბათ, უნდა ვივარაუდოთ, რომ კიდევ სხვა შეცდომებიც იქნება დაშვებული. დინამიკა ამას მავარაუდებინებს. ეს კიდევ უფრო გაახანგრძლივებს იმ დროს, რაც საჭიროა ორმხრივი ურთიერთობების დროს დადგეს, როცა დაიწყება ფურცლის გადაშლა, ურთიერთობების გადატვირთვა. პირველ რიგში, აშშ-ს ძალიან სჭირდება, რომ ეს ურთიერთობები გადაიტვირთოს. დაველოდებით ამ დღეს, რადგან ჩვენ ჩვენი სტრატეგიული პარტნიორობის ერთგულები ვიყავით და ვართ, არასდროს გვითქვამს მათთან მეგობრობაზე უარი... მოთმინებით დაველოდებით იმ დღეს, როცა ჩვენი მეგობარი კვლავ გადაწყვეტს, რომ კვლავ მეგობრულად დაგველაპარაკოს, უარი თქვას რევოლუციების მოწყობის დაფინანსებაზე იმ ჯგუფებმა, ვინც იმ ქვეყანაშია", - თქვა თეა წულუკიანმა. 6 ივნისს აშშ-ის სახელმწიფო დეპარტამენტმა ინდივიდუალური სანქციები, სავიზო აკრძალვები დაუწესა მმართველი პარტიის, "ქართული ოცნების" წევრებს და პარლამენტის წევრებს, ასევე სამართალდამცავებსა და სხვა კერძო პირებს. სახელმწიფო დეპარტამენტის პრესსპიკერმა მეთიუ მილერმა ბრიფინგი საქართველოს საკითხზე განცხადებით გახსნა. "ვაწესებთ სავიზო აკრძალვებს ათეულობით პირზე და მათ შორის - ოჯახის წევრებზე, მათზე, ვინც პასუხისმგებელია საქართველოში დემოკრატიის ძირის გამოთხრაზე, თავისუფალი შეკრების უფლებაზე, მშვიდობიანი დემონსტრანტების მიმართ ძალადობაზე... სანქციების ამ პირველ ნაკადში, მოიაზრებიან "ქართული ოცნების" წევრები, პარლამენტის წევრები, პოლიცია და კერძო პირები", - განაცხადა მეთიუ მილერმა. კითხვაზე, რამდენი ათეული ადამიანია სანქცირებულთა შორის, იგი ზუსტ რიცხვს არ ასახელებს და ამბობს: "ეს არის დაახლოებით 20-დან 30-მდე პირი და მინდა ხაზი გავუსვა იმას, რომ ეს პირველი ნაკადია". ასევე ნახეთ აშშ ინდივიდუალურ სანქციებს, სავიზო აკრძალვებს უწესებს “ქართული ოცნების” წევრებსა და დეპუტატებს ...