რუსეთმა უკრაინაზე მორიგი მასირებული შეტევისთვის გამოიყენა 53 უპილოტო საფრენი აპარატი და ხუთი ფრთოსანი რაკეტა. ამის შესახებ დღეს, 7 ივნისს დილით განაცხადა უკრაინის საჰაერო ძალების სარდალმა, გენერალ-ლეიტენანტმა მიკოლა ოლეშჩუკმა. მისი ინფორმაციით, დარტყმის სამიზნე იყო კრიტიკული ინფრასტრუქტურის ობიექტები. ოლეშჩუკის თანახმად, უკრაინის თავდაცვის ძალებმა კიევის, დნეპროპეტროვსკის, ზაპოროჟიეს, კიროვოგრადის, ნიკოლაევის, ხერსონის, ოდესის, ხარკოვის და ხმელნიცკის ოლქებში ჩამოაგდეს ხუთივე რაკეტა და 48 დრონი. კიევის საოლქო-სამხედრო ადმინისტრაციის მიერ დილით გავრცელებული ინფორმაციით, საჰაერო თავდასხმის შედეგად კიევის ოლქში ხანძარი გაჩნდა ერთ-ერთ სამრეწველო ობიექტზე. არავინ დაშავებულა. ადმინისტრაცია კონკრეტულ ობიექტს არ ასახელებს. სულ მცირე ორი ადამიანი დაიჭრა დნეპროპეტროვსკის ოლქის ქალაქ ნიკოპოლში. ადგილობრივი ხელისუფლების ინფორმაციით, დაზიანებულია 15-მდე კერძო სახლი და ელექტროგადამცემი ხაზები. რუსეთის მორიგი მასირებული შეტევის გამო უკრაინაში ოთხ საათს გაგრძელდა ღამის სამი საათისთვის გამოცხადებული საჰაერო განგაში, რომლის დროსაც მოქალაქეები ვალდებული არიან, თავი უსაფრთხო ადგილებს შეაფარონ. რუსეთის თავდაცვის სამინისტროს უკრაინაზე დღევანდელი მასირებული შეტევის შესახებ არაფერი უთქვამს. დილით გავრცელებულ ოფიციალურ ინფორმაციაში საუბარია მხოლოდ მოგერიებულ უკრაინულ დრონებზე. რუსეთის თავდაცვის სამინისტრო შედეგების დაკონკრეტების გარეშე აცხადებს, რომ 11 უპილოტო საფრენი აპარატი გაანადგურეს ყირიმის თავზე, რვა - აზოვის ზღვის აკვატორიის თავზე, ექვსი - კრასნოდარის მხარეში, ორი - ბელგოროდის ოლქში და ერთი - როსტოვის ოლქში. ასევე ნახეთ დრონებით მორიგი შეტევა იყო როსტოვის ოლქის ერთადერთ ნავთობგადამამუშავებელ ქარხანაზე ...