ყველაზე დიდი ოპოზიციური პარტიის - „ნაციონალური მოძრაობის“ თავმჯდომარე იცვლება. 8 ივნისს, პარტიის ცენტრალურ ოფისში გამართულ ბრიფინგზე გამოაცხადეს, რომ ლევან ხაბეიშვილს თინა ბოკუჩავა შეცვლის. როგორც პარტიის ყოფილმა თავმჯდომარემ, ლევან ხაბეიშვილმა განაცხადა, პოსტის დატოვების გადაწყვეტილება ჯანმრთელობის მდგომარეობის გამო მიიღო. „ჩემთვის, ცხადია, მძიმეა, თუმცა ექიმების მკაცრი რეკომენდაციით, ჩემთვის, 2-3 თვის განმავლობაში, ფაქტობრივად აკრძალულია რეჟიმში მუშაობა. შესაბამისად, ვერ მივცემ თავს უფლებას, რომ 2-3 თვის განმავლობაში, როცა არჩევნებამდე სულ რაღაც 4 თვეა დარჩენილი, პარტიის თავმჯდომარე არ იყოს ფუნქციური, არ იყოს ყოველდღიურ რეჟიმში ჩართული, არ იყოს 24-საათიან სამუშაო რეჟიმში. შესაბამისად, ჩვენი გუნდის, ყველას გადაწყვეტილებით, თინასთან კონსულტაციების შედეგად, მივიღეთ კონკრეტული გადაწყვეტილება“, - განაცხადა ლევან ხაბეიშვილმა და დაამატა, რომ სურს გახდეს „ნაციონალური მოძრაობის“ პოლიტსაბჭოს თავმჯდომარე. ამ პოსტზე მუშაობა, მისი თქმით, „ყოველდღიურ, რუტინულ მუშაობას“ არ საჭიროებს. „ნაციონალური მოძრაობის“ რიგებში საკადრო ცვლილებებს პარტიის ყრილობა დაამტკიცებს. ლევან ხაბეიშვილმა განაცხადა, რომ ყრილობას რამდენიმე დღეში მოიწვევს. „რუსი ივანიშვილის ჯალათების მხრიდან რაც მოჰყვა შენს მცდელობას, რომ ბანდიტებად ქცეული სპეცრაზმელებისგან გადაგერჩინა ახალგაზრდა, შენ შეხვდი წარმოუდგენელი სიმშვიდით, სიმტკიცით და სიმამაცით, რაც ნამდვილად მხოლოდ და მხოლოდ ისეთ ადამიანებს შეუძლიათ, რომელთაც გამარჯვების რწმენა აქვთ. ამას ასხივებდი ყოველთვის და ამისთვის ძალიან დიდი მადლობა მინდა გითხრა“, - თინა ბოკუჩავამ ლევან ხაბეიშვილს არაერთი მადლობა გადაუხადა. მისი თქმით, ხაბეიშვილის გადაწყვეტილება აჩვენებს, რომ მისთვის უპირველესია „საქართველოს ნათელი მომავალი“ და „საერთო როლი ამ ნათელ, ევროპულ მომავალში“. „დღეს წყდება ჩვენი ქვეყნის ბედი, დღეს წყდება ის, თუ სად იცხოვრებენ ჩვენი შვილები, იცხოვრებენ რუსეთის უკანა ეზოში თუ იცხოვრებენ ევროპულ საქართველოში. ამ არჩევანში, ღრმად მწამს, რომ ივანიშვილი უნდა დავტოვოთ მარტო და ყველა სხვა პოლიტიკური ძალა თუ ერთეული პოლიტიკოსი, ვინც საქართველოს გარუსებას არ ეგუება, უნდა გაერთიანდეს გამარჯვებისთვის, საქართველოსთვის, ჩვენი ქვეყნისთვის და ჩვენი ევროპული მომავლისთვის“, - განაცხადა ბოკუჩავამ. „აგენტების კანონის“ საწინააღმდეგო აქციების მსვლელობისას, ლევან ხაბეიშვილს სპეცრაზმელებმა სცემეს და მას კლინიკაში გადაყვანაც დასჭირდა. თავის არეში და სახეზე ხაბეიშვილს ძლიერი ცემის კვალი აღენიშნებოდა და უჭირდა გადაადგილება. მომხდარისთვის არავინ დასჯილა. ასევე ნახეთ ლევან ხაბეიშვილს სასტიკად სცემეს ...