„პოლიტიკური კორუფცია, პოლიტიკის ბიზნესად ქცევა, პოლიტიკურ პარტიაში, როგორც შპს-ში, მენეჯერების დანიშვნა და მერე გადანიშვნა - თუ რამეა რუსული ყაიდის ქართულ პოლიტიკაში, სწორედ ესაა“, - წერს პარტია „ახლის“ თანადამფუძნებელი ნიკა მელია მას შემდეგ, რაც „ნაციონალური მოძრაობის“ ხელმძღვანელობაში მორიგი ცვლილებები გამოცხადდა. 8 ივნისს პარტიის თავმჯდომარე ლევან ხაბეიშვილმა განაცხადა, რომ პოსტის დატოვების გადაწყვეტილება მიიღო ჯანმრთელობის მდგომარეობის გამო. იგი პოლიტსაბჭოს თავმჯდომარე ხდება, პარტიის თავმჯდომარის პოსტზე კი თინა ბოკუჩავა ჩაანაცვლებს. ასევე ნახეთ „ნაციონალური მოძრაობის“ თავმჯდომარე თინა ბოკუჩავა ხდება „ჩემთვის, ცხადია, მძიმეა, თუმცა ექიმების მკაცრი რეკომენდაციით, ჩემთვის, 2-3 თვის განმავლობაში, ფაქტობრივად აკრძალულია რეჟიმში მუშაობა. შესაბამისად, ვერ მივცემ თავს უფლებას, რომ 2-3 თვის განმავლობაში, როცა არჩევნებამდე სულ რაღაც 4 თვეა დარჩენილი, პარტიის თავმჯდომარე არ იყოს ფუნქციური, არ იყოს ყოველდღიურ რეჟიმში ჩართული, არ იყოს 24-საათიან სამუშაო რეჟიმში. შესაბამისად, ჩვენი გუნდის, ყველას გადაწყვეტილებით, თინასთან კონსულტაციების შედეგად, მივიღეთ კონკრეტული გადაწყვეტილება“, - განაცხადა ლევან ხაბეიშვილმა 8 ივნისს. ნიკა მელიამ, რომელიც პარტიის ყოფილი თავმჯდომარეა, - სწორედ ის ჩაანაცვლა ლევან ხაბეიშვილმა 2023 წლის იანვარში, - იმავე დღეს ფეისბუკზე დაწერა: „რუსულს რეჟიმს ვერ დაამარცხებ რუსული მეთოდებით. ოლიგარქს ვერ დაამარცხებ ფულით. არაფორმალურ მართვას ვერ დაამარცხებ არაფორმალური მართვის სტილით“. მელიას დაპირისპირება ენმ-სთან 2022-23 წლებში უკავშირდებოდა თავდაცვის ყოფილი მინისტრის, დავით კეზერაშვილის როლს პარტიაში. მელიამ დავით კეზერაშვილი და შინაგან საქმეთა ყოფილი მინისტრი ვანო მერაბიშვილი „ჩეკისტური მეთოდებით“ პარტიაზე არაფორმალური მმართველობის მოპოვების მცდელობაში დაადანაშაულა. „ნაციონალურ მოძრაობაში“ ცვლილებას გამოეხმაურა „ქართული ოცნების“ პარლამენტარი ირაკლი ზარქუა. მან განაცხადა: „ყველაფერი ცუდი, რაც შეიძლება გუნდელს კაცმა გაუკეთოს, ის გააკეთებინეს. ჯერ მელიას გასაიდუმლოებული საბჭო ჩაუნიშნეს, სადაც ეს თემა დააყენეს და გადააგდეს... ბუნებრივია, საზოგადოებისთვის არაფერი იცვლება. „ხაბე“ იყო ნომინალური და ახლა ვისაც დანიშნავენ, ისიც ნომინალური იქნება“. პარტიის მენეჯმენტში ცვლილებებს გამოეხმაურა პატიმრობაში მყოფი ექსპრეზიდენტი მიხეილ სააკაშვილი. მან ფეისბუკზე დაწერა: „მხარს ვუჭერ თინა ბოკუჩავას ახალ თავმჯდომარედ არჩევას და პარტიის განახლებისაკენ გადადგმულ ნაბიჯებს“. იგი აცხადებს, რომ „დღევანდელი გადაწყვეტილება არის ერთიანი ნაციონალური მოძრაობის მუდმივი განახლების და სიმტკიცის ნიმუში“. три ...