უკრაინის შეიარაღებული ძალების გენერალური შტაბის განცხადებით, 10 ივნისის ღამეს უკრაინის თავდაცვის ძალებმა დარტყმები განახორციელეს ანექსირებულ ყირიმში, S-400-ის ტიპის ერთ სარაკეტო სისტემაზე ჯანკოის რაიონში, და S-300-ის ტიპის ორ სისტემაზე ჩერნომორსკის და ევპატორიის არეალებში. განცხადების თანახმად, არ გადაუტაციათ უკრაინის მიერ გაშვებული არც ერთი რაკეტა, ხოლო სისტემების რადარებმა დარტყმების შემდეგ მუშაობა შეწყვიტა. რუსეთის თავდაცვის სამინისტროს ამ ცნობებზე ჯერჯერობით არ გაუვრცელებია განცხადება. ტელეგრამის არხი Astra წყაროზე დაყრდნობით წერს, რომ ნახევარკუნძულზე იერიში მიიტანეს ATACMS-ის ტიპის სულ მცირე ათი რაკეტით. 2022 წლის აგვისტოს შემდეგ ანექსირებულ ყირიმსა და სევასტოპოლში თითქმის ყოველდღიურად ისმის აფეთქებების ხმა. რუსეთის ხელისუფლება ამას ხსნის ცეცხლის გახსნით "უკრაინის უპილოტო აპარატებისთვის", საჰაერო დაცვის მოქმედებით და სამხედრო წვრთნებით. ნახევარკუნძულზე მოქმედებს ტერორისტული საფრთხის მაღალი (ყვითელი) დონე. სიმფეროპოლის აეროპორტი დაკეტილია. კიევს გამოყენებული აქვს დასავლური წარმოების იარაღი დარტყმებისთვის ანექსირებულ ყირიმზე, ვინაიდან, საერთაშორისო თანამეგობრობის აღიარებით, საქმე ეხება უკრაინის ტერიტორიას. ასევე ნახეთ როგორ და რის ფასად იცავს რუსეთი ყირიმის ხიდს? ...