შეერთებული შტატების მთავრობა უკრაინის სპეცდანიშნულების ბრიგადა „აზოვს” აღარ უკრძალავს ამერიკული იარაღის გამოყენებას. ამის შესახებ გამოცემა Washington Post-ი წერს სახელმწიფო დეპარტამენტზე დაყრდნობით. უკრაინელი მოხალისეების მიერ 2014 წელს შექმნილი პოლკი „აზოვი” დღეს ეროვნული გვარდიის შემადგენლობაშია, როგორც სპეცდანიშნულების მე-12 ბრიგადა. წლების წინ, შეერთებულმა შტატებმა აკრძალა „აზოვის” წევრების მიერ ამერიკული იარაღის გამოყენება, მას შემდეგ, რაც დაადგინა, რომ პოლკის ზოგიერთ დამფუძნებელს რასისტული, ქსენოფობიური და ულტრანაციონალისტური შეხედულებები ჰქონდა, გაეროს წარმომადგენლებმა კი ეს ჯგუფი ჰუმანიტარული სამართლის დარღვევაში დაადანაშაულეს. Washington Post-ს სახელმწიფო დეპარტამენტში განუცხადეს, რომ აკრძალვის გაუქმება მას შემდეგ გადაწყვიტეს, რაც „აზოვის” დღევანდელი შემადგენლობა ლიჰის კანონის საფუძველზე შეამოწმეს. ყოფილი სენატორის, პატრიკ ლიჰის მიერ დაწერილი ეს კანონი კრძალავს შეერთებული შტატების მიერ სამხედრო დახმარების გაწევას ისეთი დაჯგუფებებისთვის, რომლებიც ადამიანის უფლებებს არღვევენ. სახელმწიფო დეპარტამენტის თანახმად, უკრაინის ეროვნული გვარდიის მე-12 სპეცდანიშნულების ბრიგადა „აზოვის” შემოწმებისას დარღვევების მტკიცებულებები არ აღმოუჩენიათ. სახელმწიფო დეპარტამენტში არ დააკონკრეტეს, როდის გაუქმდა აკრძალვა და უკვე აქვთ თუ არა „აზოვის” წევრებს ამერიკული იარაღი. ასევე ნახეთ ცარიელი კორპუსები, დანგრეული შენობები, სიცივე - ცხოვრება ოკუპირებულ მარიუპოლში „აზოვის” მებრძოლებმა სახელი გაითქვეს 2022 წლის გაზაფხულზე, როცა თითქმის სამი თვის განმავლობაში მამაცურად იცავდნენ რუსეთის ჯარების მიერ ალყაში მოქცეულ ქალაქ მარიუპოლს და „აზოვსტალს”. მარიუპოლი 2022 წლის მაისში დაეცა. უკრაინის ხელისუფლებაში აცხადებდნენ, რომ „აზოვსტალის” დაცვა გაცილებით ეფექტიანი იქნებოდა მებრძოლებს ამერიკული იარაღი რომ ჰქონოდათ. რუსეთს „აზოვი” ტერორისტულ ორგანიზაციად ჰყავს გამოცხადებული. ...