კიევს ესაჭიროება Patriot-ის ტიპის საჰაერო თავდაცვის არანაკლებ შვიდი კომპლექსი რუსეთის არმიის თავდასხმისგან თავდასაცავად, - ამის შესახებ უკრაინის პრეზიდენტმა, ვლადიმირ ზელენსკიმ ბერლინში უკრაინის აღდგენის კონფერენციაზე გამოსვლისას განაცხადა. ზელენსკიმ მადლობა გადაუხადა გერმანიას კიევში უკვე მიწოდებული Patriot-ის სამი სისტემისთვის. "საჰაერო თავდაცვა - ეს არის პასუხი ყველა კითხვაზე", - თქვა ზელენსკიმ. უკრაინის პრეზიდენტმა ასევე აღნიშნა, რომ რუსეთის ერთ-ერთი მიზანია უკრაინის ენერგომომარაგების განადგურება. ამასთან, მისი თქმით, უკრაინას აქვს ცხადი გეგმა, ააშენოს ერთი გიგავატის ენერგეტიკული სიმძლავრის ობიექტი წელს და ოთხი გიგავატისა - მომდევნო წლებში. გარდა ამისა, ზელენსკიმ განაცხადა, რომ კიევი ზამთრის დაწყებამდე ყველა შესაძლო ენერგეტიკული ობიექტის აღდგენას გეგმავს. გერმანიის კანცლერმა ოლაფ შოლციმა კონფერენციაზე გამოსვლისას კიევის მოკავშირეებს მოუწოდა კიდევ უფრო გააძლიერონ უკრაინის საზენიტო თავდაცვის სისტემა. შოლცის თქმით, ის აპირებს ამ საკითხის წამოწევას იტალიაში “დიდი შვიდეულის” G7-ის სამიტზე, რომელიც 13 ივნისს დაიწყებს მუშაობას. გამოსვლისას კანცლერმა მსოფლიო ბანკის მონაცემებზე მიუთითა, რომლის მიხედვითაც უკრაინას მომავალი 10 წლის განმავლობაში აღდგენისთვის დაახლოებით 500 მილიარდი დოლარი დასჭირდება. ევროკომისიის ხელმძღვანელმა, ურზულა ფონ დერ ლაიენმა ბერლინში გამართულ კონფერენციაზე განაცხადა, რომ G7-ის სამიტზე უკრაინისთვის რუსეთის აქტივების გამოყენებაზე იმსჯელებენ სამრეწველო თვალსაზრისით მსოფლიოს შვიდი უძლიერესი სახელმწიფოს მეთაურები - “დიდი შვიდეული” იტალიაში, აპულიაში შეხვედრაზე იმსჯელებენ რუსეთის გაყინული აქტივების უკრაინისთვის მოხმარების პროცესის დაჩქარების გარშემო. გარდა ამისა, ივნისში უკრაინა მიიღებს თითქმის ორ მილიარდ ევროს UkraineFacility-ის პროგრამის ფარგლებში. უკრაინის აღდგენის კონფერენცია ბერლინში 11-12 ივნისს იმართება. ღონისძიებაში 60-მდე ქვეყნიდან ორი ათასამდე პოლიტიკოსი, ბიზნესმენი, საერთაშორისო ორგანიზაციის წარმომადგენელი მონაწილეობს. კონფეროენციაში მონაწილეობას იღებს საქართველოს პრემიერ-მინისტრი, ირაკლი კოლბახიძე. კონფერენციის ფარგლებში გერმანიის მთავრობა, კიევთან ერთად, უკრაინის აღდგენისა და ინვესტიციების სტიმულირების გრძელვადიანი გეგმის შემუშავებას აპირებს. ასევე ნახეთ კობახიძე უკრაინელი ხალხის დახმარებაზე საუბრობს ხელისუფლებებს შორის არსებული სირთულეების მიუხედავად ასევე ნახეთ უკრაინა გერმანიისგან კიდევ ერთ სისტემა “პატრიოტს” და დანადგარ IRIS-T-ს მიიღეს-ოლაფ შოლცი ...