სპეციალურმა საგამოძიებო სამსახურის ცნობით, 13 წლის გოგოს პირადი ცხოვრების საიდუმლოს ხელყოფის ფაქტზე 19 წლის კაცი დააკავეს. საგამოძიებო ორგანოს განცხადებაში აღწერილია, რომ გამოგონილი სახელით ახალგაზრდა კაცმა სოციალური ქსელ Facebook-ის საშუალებით 13 წლის გოგო გაიცნო. გამოძიების ინფორმაციით, ბრალდებულმა არასრულწლოვანს დაშინებით გადაუღო ინტიმური კადრები, რომელიც მის ოჯახის წევრებს გაუგზავნა. „გაცნობიდან მალევე, მათ შორის მიმოწერამ მიიღო ინტენსიური ხასიათი, ისინი ყოველდღიურად საუბრობდნენ ერთმანეთთან Facebook/Messenger-ის ვიდეოზარების საშუალებით, რა დროსაც ბრალდებულმა დაშინებით და შანტაჟის გზით, დაზარალებული აიძულა მის წინაშე გაშიშვლებულიყო, წინააღმდეგ შემთხვევაში ოჯახის წევრებისთვის ზიანის მიყენებით დაემუქრა. 2024 წლის მაისში, ბრალდებულმა არასრულწლოვანი დაზარალებულის 17 წლის დას და მამინაცვალს 13 წლის გოგოს ინტიმური შინაარსის ვიდეო-ფაილები გადაუგზავნა. ასევე, დაზარალებულის დასაც მოსთხოვა მის წინაშე გაშიშვლება, წინააღმდეგ შემთხვევაში დაზარალებულის ინტიმური ხასიათის ვიდეოჩანაწერების გასაჯაროებით დაემუქრა. უარის მიღების შემდეგ ბრალდებულმა სოციალური ქსელ Facebook-ში გამოაქვეყნა დაზარალებულ არასრულწლოვანთან ვიდეოზარებით კომუნიკაციისას გადაღებული ინტიმური შინაარსის ვიდეოჩანაწერები“, - წერია განცხადებაში. როგორც სპეციალური საგამოძიებო სამსახური აცხადებს, დაზარალებული არასრულწლოვანის დედის მიმართვის შემდეგ, გამოძიება დაიწყო. ბრალდებულის პირადი ჩხრეკისას მის მობილურ ტელეფონში, 13 წლის გოგოს ინტიმური ხასიათის ვიდეოჩანაწერები ნახეს და მტკიცებულების სახით ამოიღეს. ბრალდებული დაკავებულია საქართველოს სისხლის სამართლის კოდექსის 157-ე პრიმა მუხლის პირველი ნაწილით [პირადი ცხოვრების საიდუმლოს უკანონოდ მოპოვება, შენახვა, გამოყენება, გავრცელება ან ხელმისაწვდომობის სხვაგვარი უზრუნველყოფა] გათვალისწინებული დანაშაულისთვის. მას აღკვეთის ღონისძიების სახით პატიმრობა შეუფარდეს. დანაშაული ოთხიდან შვიდ წლამდე თავისუფლების აღკვეთას ითვალისწინებს. ასევე ნახეთ დააკავეს კაცი, რომელიც ქალს ფოტოგრაფად გაეცნო, ფოტოები გადაუღო და აშანტაჟებდა - სპეციალური საგამოძიებო სამსახური ...