უკრაინის წინააღმდეგ ომში დაიღუპა რუსეთის მე-6 გამოსასწორებელი კოლონიის ყოფილი უფროსი ალექსეი ლევინი, რომელსაც 9 წელი ჰქონდა მისჯილი ქრთამის აღებისა და ორი პატიმრის წამების საქმეზე. როგორც რადიო თავისუფლების რუსული სამსახური წერს, 49 წლის ლევინი რუსეთის თავდაცვის სამინისტროსთან დადებული კონტრაქტის საფუძველზე ერთ-ერთ მოიერიშე ასეულში მსახურობდა და 8 მაისს, უკრაინის ლუგანსკის ოლქის სვატოვის რაიონში დაიღუპა. თანამებრძოლების ცნობით, ლევინი 2 ივნისს დაკრძალეს. 2021 წლის ივნისში ალექსი ლევინს სამი წლით პატიმრობა მიუსაჯეს სამსახურებრივი გულგრილობის გამო, რამაც ორი პატიმრის სიკვდილი გამოიწვია. ერთი პატიმარი, რომან სარიჩევი, 2019 წელს სასიკვდილოდ სცემა კოლონიის თანამშრომელმა, სერგეი შევცოვმა. კიდევ ერთი პატიმარი ნომერ მე-6 კოლონიაში 2018 წელს გაიგუდა, მას შემდეგ, რაც ნაჭრით სახე გადაუხვიეს და ხელბორკილით მაგიდაზე მიაბეს. 2023 წლის ზაფხულში ლევინი კიდევ ერთ საქმეზე- კოლონიისათვის ნედლეულის მიწოდების თაობაზე სახელმწიფო ხელშეკრულებების დადების სანაცვლოდ ქრთამის აღებისთვის გაასამართლეს. წინა სასჯელის გათვალისწინებით, მას 9 წლით თავისუფლების აღკვეთა მიესაჯა. რუსეთის ფედერალური სასჯელაღსრულების ჟურნალ FSIN-ის მონაცემებით, 2023 წელს რუსულ კოლონიებში პატიმრების რაოდენობა რეკორდულად-58 ათასი ადამიანით შემცირდა. 2022-2023 წლებში პატიმრების რაოდენობის შემცირება უკავშირდებოდა მათ მასობრივ რეკრუტირებას ჯერ კერძო სამხედრო კომპანია „ვაგნერისა, მოგვიანებით კუ თავდაცვის სამინისტროს დანაყოფ „შტორმის“ მიერ, რომლებიც პატიმრებს უკრაინაში მიმდინარე საომარ მოქმედებებში იყენებენ. "ბიბისის" მიერ ჩატარებული გამოძიებით ბახმუტის გარშემო მიმდინარე ბრძოლაში დაახლოებით 18 ათასი პატიმარი დაიღუპა. „ვაგნერის“ დამფუძნებელმა, ევგენი პრიგოჟინის შეფასებით ბახმუტთან ქვედანაყოფის საერთო დანაკარგი 22 ათასს შეადგენდა. ასევე ნახეთ გამარჯვება თუ ხაფანგი? რატომ შესწირა რუსეთმა ოცი ათასი კაცი ბახმუტისთვის ბრძოლას მედიაში რეგულარულად ვრცელდება ცნობები ასობით სერიოზული დანაშაულების, მათ შორის მკვლელობებისა და გაუპატიურების შესახებ, რომლებსაც უკრაინიდან დემობილიზებული ყოფილი პატიმრები სჩადიან. ამ სტატისტიკის გავრცელებით გამოწვეული რეზონანსის გამო, კრემლმა მის მიერ კონტროლირებად ჟურნალისტებს აუკრძალა მსგავს ინციდენტებზე საუბარი. ...