სომხეთის პრემიერ-მინისტრმა, ნიკოლ ფაშინიანმა 12 ივნისს, პარლამენტის დეპუტატების კითხვებზე პასუხად თქვა, რომ ქვეყნის ხელისუფლება შესაფერის დროს მიიღებს გადაწყვეტილებას კოლექტიური უსაფრთხოების ხელშეკრულების ორგანიზაციიდან (CSTO/ОДКБ) გასვლის შესახებ - სამხედრო-პოლიტიკური ბლოკის, რომელიც რუსეთის ხელმძღვანელობით მოქმედებს. ოპოზიციონერი დეპუტატის, ტადევოს ავეტისიანის კითხვის პასუხად ფაშინიანმა ორგანიზაციას უწოდა "კავშირი-ბუშტი", რომლის წევრებმაც არაფერი გააკეთეს სომხეთის დასახმარებლად აზერბაიჯანთან ომში და მეტიც, ისინი ბაქოს ეხმარებოდნენ ომის დაგეგმვაში. ოპოზიციონერების რეპლიკების პასუხად - ასეთ შემთხვევაში რატომ არ გადის სომხეთი CSTO-დან - ფაშინიანმა თქვა: "ჩვენ თავად გადავწყვეტთ, როდის გავალთ. როგორ ფიქრობთ, რა იქნება შემდეგი ნაბიჯი, ჩვენ შევძლებთ დაბრუნებას?" - ფაშინიანის ამ სიტყვებს ავრცელებს რადიო თავისუფლების სომხური სამსახური. აქამდე ფაშინიანი ამბობდა, რომ CSTO-ს მინიმუმ ორი წევრი ქვეყანა "მონაწილეობდა მომზადებაში ომისა", რომლითაც აზერბაიჯანმა თავისი კონტროლის ქვეშ დაიბრუნა ჯერ მთიანი ყარაბაღის ტერიტორიის ნაწილი, შემდეგ კი მთლიანად რეგიონი. ფაშინიანს ეს სახელმწიფოები არ დაუსახელებია, თუმცა მისი რეპლიკა მიემართებოდა ბელარუსის ავტორიტარი ლიდერის, ალიაქსანდრ ლუკაშენკას მიერ ბაქოში ვიზიტისას გაკეთებულ განცხადებებს. ფაშინიანს ასევე ნათქვამი აქვს, რომ სომხეთმა, ფაქტობრივად, გაყინა თავისი წევრობა ამ ორგანიზაციაში, მაისში კი ერევანი აცხადებდა, რომ წყვეტს CSTO-ს მოქმედებების დაფინანსებას. რუსეთის ხელისუფლებამ არაერთხელ გააკრიტიკა ერევანი - რუსეთის განცხადებით, მოსკოვმა შეასრულა სომხეთის წინაშე ნაკისრი ყველა ვალდებულება. რუსეთის წარმომადგენელთა ნაწილი ფაშინიანს ღიად ადანაშაულებს პროდასავლური ორიენტაციის ქონაში. ამასთან, პრეზიდენტი ვლადიმირ პუტინი ირწმუნება, რომ ორმხრივ ურთიერთობაში განსაკუთრებული პრობლემები არ არის. ოთხშაბათს ფაშინიანმა ასევე თქვა, რომ ბაქო და ერევანი ახლოს არიან სამშვიდობო შეთანხმების მიღწევასთან. აზერბაიჯანში ჯერჯერობით ეს განცხადება არ დაუდასტურებიათ. ფაშინიანის განცხადებების ფონია ერევანში მიმდინარე მასშტაბური ანტისამთავრობო გამოსვლები, პარლამენტის შენობის წინ კარვების ქალაქია გაშლილი. დემონსტრანტები ფაშინიანს ბრალს სდებენ ეროვნული ინტერესების დათმობაში, აზერბაიჯანთან საზღვრის დემარკაციის შეთანხმების მიღწევის პროცესში. ოთხშაბათსვე აზერბაიჯანის ხელისუფლებამ გამოაცხადა, რომ მთიანი ყარაბაღი სრულად დატოვა რუსეთის სამშვიდობო კონტინგენტმა. ასევე ნახეთ ბაქო: მთიანი ყარაბაღიდან სრულად გავიდა რუსეთის სამხედრო კონტინგენტი ...