ერევანში, სომხეთის პარლამენტთან, ანტისამთავრობო საპროტესტო აქციის მონაწილეებსა და პოლიციას შორის 12 ივნისს, საღამოს, მომხდარი დაპირისპირების შედეგად 101 ადამიანი დაშავდა. ეს ინფორმაცია დღეს, 13 ივნისს დილით, გამოაქვეყნა სომხეთის ჯანდაცვის სამინისტრომ. მისი მონაცემებით, 85-მა პირმა სამედიცინო დაწესებულებები პირველადი დახმარების გაწევის შემდეგ დატოვა, სხვები კი კლინიკაში რჩებიან. სომხეთის შსს-ს ცნობით, დაშავებულებს შორის 16 პოლიციელია. დაპირისპირება მას შემდეგ დაიწყო, რაც პრემიერ-მინისტრ ნიკოლ ფაშინიანის გადადგომის მოთხოვნით მიმდინარე აქციის მონაწილეებმა სომხეთის პარლამენტის შენობისკენ მიმავალი, პოლიციის მიერ გადაკეტილი გზების გარღვევა სცადეს. ამ დროს პარლამენტში ფაშინიანიც იმყოფებოდა. 12 ივნისს სამართალდამცავებს გადაკეტილი ჰქონდათ სომხეთის პარლამენტისკენ მიმავალი გზები დემონსტრანტების დასაშლელად სამართალდამცავებმა გამოიყენეს სპეციალური საშუალებები, მათ შორის აკუსტიკური იარაღი. დაკავებულია აქციის, სულ მცირე, 70 მონაწილე. სომხეთის ხელისუფლებამ პოლიციის ქმედებებს კანონიერი უწოდა. საგამოძიებო კომიტეტმა სისხლის სამართლის საქმე აღძრა მასობრივი არეულობის ორგანიზების და მასში მონაწილეობის მუხლით. სომხეთის პოლიციამ ერევანში დემონსტრანტებს პარლამენტისკენ მისასვლელი გზა დაუბლოკა და გარღვევის აღსაკვეთად სპეცსაშუალებები გამოიყენა. სომხეთში მაისის დასაწყისიდან გრძელდება საპროტესტო აქციები პრემიერ-მინისტრ ნიკოლ ფაშინიანის გადადგომის და დროებითი მთავრობის შექმნის მოთხოვნით. გამოსვლები მას შემდეგ დაიწყო, რაც სომხეთ-აზერბაიჯანის სასაზღვრო შეთანხმების საფუძველზე ბაქომ დაიბრუნა სომხეთის ტავუშის რაიონთან მოსაზღვრე ოთხი სოფელი. ანტისამთავრობო საპროტესტო მოძრაობას, „ტავუში სამშობლოსთვის“ ხელმძღვანელობს ტავუშის არქიეპისკოპოსი ბაგრატი(გალსტანიანი). მან 12 ივნისს, პოლიციელების ქმედებებს „ტერორი" უწოდა. თავის მხრივ, სომხეთის ხელისუფლებამ აქციის მონაწილეები დაადანაშაულა პარლამენტზე თავდასხმის მცდელობაში. ასევე ნახეთ ბაგრატ გალსტანიანი: სომეხი არქიეპისკოპოსი მთავრობას უპირისპირდება მთიან ყარაბაღზე აზერბაიჯანის კონტროლის სრულად აღდგენის შემდეგ, ბაქომ და ერევანმა მოლაპარაკება დაიწყეს სამშვიდობო შეთანხმებაზე, რომლის მისაღწევად დღის წესრიგში დადგა საზღვრის დელიმიტაცია-დემარკაციის საკითხიც. 2024 წლის მარტში სომხეთის პრემიერ-მინისტრმა ნიკოლ ფაშინიანმა განაცხადა, რომ პროცესი დაიწყო. ამას ოპოზიციის პროტესტი მოჰყვა. 1 მაისს სომხეთის საზოგადოებრივ მაუწყებელთან ინტერვიუში ფაშინიანმა განაცხადა, რომ აზერბაიჯანთან საზღვრის დელიმიტაცია აუცილებელია, რადგან წინააღმდეგ შემთხვევაში შესაძლოა, ახალი კონფლიქტი გამოიწვიოს. ერევანსა და ბაქოს შორის მიღწეულ შეთანხმ...