თბილისის მერიის განცხადებით, ვაკის რაიონში წყნეთის გზატკეცილის სრული რეაბილიტაცია იწყება. სამუშაოები ჩატარდება წყნეთის გზატკეცილის N6-დან (ე.წ. ბაგების კუნძულებიდან) ბაგების დასახლების ახალ საავტომობილო ხიდამდე არსებულ საგზაო მონაკვეთში. დაგეგმილი სამუშაოების გამო, 15 ივნისის 00:00 საათიდან ოთხი თვის განმავლობაში, გზის აღნიშნულ მონაკვეთში ტრანსპორტის გადაადგილება სრულად შეიზღუდება. როგორც მერია აღნიშნავს, ტერიტორიაზე გადაადგილებას საკუთარი ავტომობილებით მხოლოდ ადგილობრივი მცხოვრებლები შეძლებენ. მერიის ცნობით, სხვა სატრანსპორტო საშუალებები როგორც ჭავჭავაძის გამზირიდან წყნეთის მიმართულებით, ასევე წყნეთისა და ბაგების მხრიდან ჭავჭავაძის გამზირის მიმართულებით, იმოძრავებს საბურთალო-ბაგების დამაკავშირებელი ხიდის, უნივერსიტეტის ქუჩისა და თამარაშვილის გამზირის გავლით. წყნეთის გზატკეცილზე და უჩანეიშვილის ქუჩის კვეთაზე მდებარე საავტომობილო კვანძიდან ტრანსპორტის გადაადგილება შესაძლებელი იქნება როგორც უჩანეიშვილის ქუჩის, ისე ლევან სამხარაულის სახელობის სასამართლო ექსპერტიზის ეროვნული ბიუროს მიმართულებით. რეაბილიტაციის ფარგლებში ცვლილებები შევა ავტობუსების მარშრუტებშიც. კერძოდ, N345 და N351 წყნეთის გზატკეცილზე მოძრაობას დაასრულებს ლევან სამხარაულის სახელობის სასამართლო ექსპერტიზის ეროვნული ბიუროს მიმდებარე ტერიტორიაზე. N307, N354 და N359 ავტობუსები ჭავჭავაძის გამზირიდან (ვაკის პარკის მიმდებარე ტერიტორიიდან) გადაადგილდება თამარაშვილის გამზირზე, იმოძრავებს უნივერსიტეტის ქუჩისკენ, რის შემდეგაც ბაგების დასახლებისა და უნივერსიტეტის ქუჩის დამაკავშირებელი საავტომობილო ხიდით გადავა თბილისის სახელმწიფო უნივერსიტეტის საერთო საცხოვრებელთან, N354 ავტობუსი კი მოძრაობას წყნეთის მიმართულებით გააგრძელებს. აღნიშნული ავტობუსები უკუმიმართულებით იმავე მარშრუტით, ბაგების დასახლებისა და უნივერსიტეტის ქუჩის დამაკავშირებელი საავტომობილო ხიდით, უნივერსიტეტის ქუჩისა და თამარაშვილის გამზირის გამოყენებით გადაადგილდება. რაც შეეხება N334-ის მარშრუტს, ავტობუსი მეტროსადგურ „დელისიდან“ დაუკავშირდება თამარაშვილის გამზირს, უნივერსიტეტის ქუჩას, შემდეგ კი ბაგების ახალი ხიდით წყნეთის გზატკეცილზე გადაინაცვლებს, საიდანაც იმოძრავებს დადგენილი სქემით. უკუმიმართულებისას, ავტობუსი იმოძრავებს ბაგების დასახლებისა და უნივერსიტეტის ქუჩის დამაკავშირებელი საავტომობილო ხიდის, ასევე უნივერსიტეტის ქუჩის გამოყენებით, რის შემდეგაც თამარაშვილის გამზირიდან დაუკავშირდება მეტროსადგურ „დელისს“. ...