ხუთშაბათს რუსეთის მიერ კონტროლირებად დონეცკის ქალაქ ჰორლოვკაში დაიღუპა რუსული ტელეკომპანია NTV-ს კორესპონდენტი, ოპერატორი ვალერი კოჟინი. რუსეთის სახელმწიფო საინფორმაციო სააგენტო "რია ნოვოსტის" ცნობით, დაბომბვის შედეგად დაჭრილი ოპერატორი საავადმყოფოში მიყვანის შემდეგ გარდაიცვალა. მანამდე რეგიონის რუსული ადმინისტრაციის ხელმძღვანელობამ გაავრცელა ინფორმაცია, რომ ტელეკომპანია „ენტევეს“ ორი თანამშრომელი - კორესპონდენტი ალექსეი ივლიევი და ოპერატორი ვალერი კოჟინი - დრონებით იერიშის შემდეგ მძიმედ დაზიანდნენ ნაღმის ნამსხვრევებით. ივლიევის მდგომარეობა, რუსეთის ტელეკომპანიის თანახმად, სტაბილურია. უკრაინულ მხარეს ჟურნალისტებზე იერიშის შესახებ ცნობაზე კომენტარი არ გაუკეთებია. გარდაცვლილი ოპერატორი კოჟინი, როგორც რუსული მედია იტყობინება, ადრე აშუქებდა იმ სამხედრო კონფლიქტებს, რომლებშიც რუსეთის არმია მონაწილეობდა, კერძოდ, სირიაში. რუსეთის მასშტაბური შეჭრის დაწყებამდე, იგი მივლინებით იმყოფებოდა ე.წ. დონეცკისა და ლუგანსკის სახალხო რესპუბლიკებში. ეს არ არის უკრაინაში ომის გასაშუქებლად მყოფი რუსეთის სახელმწიფო საინფორმაციო საშუალების თანამშრომლის დაღუპვის პირველი შემთხვევა. გასული წლის ივლისში, ზაპოროჟიეს რეგიონში სააგენტო „რია ნოვოსტის“ კორესპონდენტი როსტისლავ ჟურავლევი დაიღუპა. ასევე ნახეთ უკრაინაში დაიღუპა რუსული სააგენტო „რია ნოვოსტის“ კორესპონდენტი ხოლო ნოემბერში მიღებული ჭრილობების შედეგად იმავე ზაპოროჟიეს რეგიონში ტელეკომპანია "როსია -24-ის" კორესპონდენტი ბორის მაქსუდოვი დაიღუპა. რუსეთის მიერ უკრაინაში გაჩაღებულ ომში ათზე მეტი უკრაინელი ჟურნალისტი დაიღუპა. ასევე ნახეთ უკრაინაში კიდევ ერთი ჟურნალისტი, ალექსანდრ ბონდარენკო დაიღუპა ...