შეერთებული შტატებისა და უკრაინის პრეზიდენტებმა ჯო ბაიდენმა და ვოლოდიმირ ზელენსკიმ ხელი მოაწერეს ათწლიან შეთანხმებას ორ ქვეყანას შორის უსაფრთხოების სფეროში თანამშრომლობის შესახებ. ხელმოწერის ცერემონია გაიმართა “დიდი შვიდეულის” (G7) ჯგუფის სამიტის ფარგლებში, რომელიც იტალიაში მიმდინარეობს. ვოლოდიმირ ზელენსკი მსოფლიოს შვიდი წამყვანი დემოკრატიული ქვეყნის ლიდერებმა მიიწვიეს იტალიაში მიმდინარე სამიტზე, სადაც, სხვა საკითხებთან ერთად, რუსეთთან ომში უკრაინისათვის მხარდაჭერაც განიხილეს. როგორც სააგენტო “როიტერსი” წერს, შეთანხმების ტექსტში პირდაპირ არის აღნიშნული, რომ დოკუმენტი, სხვა საკითხებთან ერთად, უკრაინისათვის ნატოში გაწევრიანების დახმარებასაც ისახავს მიზნად. დოკუმენტი არ შეიცავს ვალდებულებას, უზრუნველყოს უკრაინის სამხედრო მხარდაჭერა მის წინააღმდეგ აგრესიის შემთხვევაში, როგორც ეს ჩრდილოატლანტიკური ხელშეკრულებით არის გათვალისწინებული. აგრესიის ან მისი საფრთხისას, გათვალისწინებულია 24-საათიანი საკონსულტაციო მექანიზმი იმის დასადგენად, თუ რა ზომების მიღება შეიძლება უკრაინის თავდაცვის პოტენციალის გასაძლიერებლად. შეთანხმება ასევე ადასტურებს შეერთებული შტატების ერთგულებას უკრაინის სუვერენიტეტისა და ტერიტორიული მთლიანობის მიმართ. შეერთებული შტატები იღებს ვალდებულებას, უკრაინას დაეხმაროს იარაღის გრძელვადიანი მიწოდებით, სამხედრო პერსონალის მომზადებითა და რჩევებით. ამავდროულად, ამერიკული გამოცემა Washington Post-ი შეახსენებს მკითხველს, რომ შეერთებულ შტატებსა და უკრაინას შორის შეთანხმება არ ითვალისწინებს კონგრესის მიერ დამტკიცებას, შესაბამისად ის ნებისმიერ დროს შეიძლება გაუქმდეს ნებისმიერი მომავალი ამერიკელი პრეზიდენტის მიერ. შეთანხმება არ ითვალისწინებს შეერთებული შტატების ვალდებულებებს, გაგზავნოს თავისი სამხედროები უკრაინაში და მონაწილეობა მიიღოს საომარ მოქმედებებში. ასევე ნახეთ იტალიაში G7-ის სამიტი მიმდინარეობს. უკრაინის დახმარება შეხვედრის მთავარი საკითხია "დიდი შვიდეულის" (G7) სამიტის გახსნამდეც, ჯგუფის წევრები დათანხმდნენ აშშ-ის წინადადებას, უკრაინისთვის 50 მილიარდი დოლარის ოდენობის სესხი გირაოდ დაეყრდნოს რუსეთის გაყინულ ქონებას. ეს შეთანხმება წარმოადგენს კიევისთვის გამოცხადებულ მძლავრ მხარდაჭერას, მაშინაც კი, თუკი ევროპის პოლიტიკურ სივრცეში მემარჯვენე სპექტრის ძალები ძლიერდებიან. თავის მხრივ, ზელენსკიმ დღევანდელ დღეს "ისტორიული" უწოდა და აღნიშნა, რომ "დიდი შვიდეულის" სამიტზე შეერთებულ შტატებთან მიღწეული შეთანხმება არის ყველაზე მნიშვნელოვანი ორმხრივი შეთანხმება, რომელიც დაიდო უკრაინის დამოუკიდებლობის მოპოვების შემდეგ. უკრაინის პრეზიდენტმა ასევე გაიმეორა თავისი მოწოდება, რომ უკრაინას კიდევ შვიდი ერთეული საჰაერო თავდაცვის სისტემა &...