თეთრი სახლის კორესპონდენტთა ასოციაციამ განაცხადა, რომ პრეზიდენტის ადმინისტრაციას და თავად პრეზიდენტს არ შეუძლიათ აირჩიონ, რა შეკითხვებს დასვამენ ჟურნალისტები. ამის შესახებ გამოცემა Deadline-ი წერს. ასოციაციამ განცხადება იტალიაში გამართულ პრესკონფერენციაზე აშშ-ის პრეზიდენტის, ჯო ბაიდენის ნათქვამის შემდეგ გააკეთა. ბაიდენისა და უკრაინის პრეზიდენტ ვოლოდიმირ ზელენსკის პრესკონფერენცია გუშინ, 13 ივნისს, გაიმართა „დიდი შვიდეულის“ სამიტზე. Bloomberg-ის ჟურნალისტმა ბაიდენს ჰკითხა ჰამასზე, რომელიც აშშ-სა და ევროკავშირში ტერორისტულ დაჯგუფებად არის მიჩნეული. ბაიდენმა ჟურნალისტებს მიმართა, რომ „წესებით თამაშს“ ისურვებდა: „ მე აქ უკრაინაში კრიტიკული ვითარების შესახებ სასაუბროდ ვარ, თქვენ კი სხვა რამეს მეკითხებით“, - თქვა მან. მანამდე ბაიდენს ჰკითხეს მის ვაჟზე, რომელსაც პატიმრობა ემუქრება. ბაიდენმა კითხვებს მაინც უპასუხა. თეთრი სახლის კორესპონდენტთა ასოციაციამ გადაწყვიტა, „საზოგადოებრივი ინტერესის გამო განმარტოს, რომ ჟურნალისტებს ბაიდენის პრესკონფერენციებზე კითხვების თემატიკის შესახებ პირობებს არ უყენებენ“. „თეთრი სახლი განსაზღვრავს რეპორტიორთა რაოდენობას, ვისთანაც ისაუბრებს პრეზიდენტი, და შემდეგ ისინი წყვეტენ, რა ჰკითხონ. შეიძლება ნებისმიერ ხელმძღვანელს ურჩევნია, რომ რეპორტიორმა მხოლოდ ერთი შეკითხვა დაუსვას ან მხოლოდ იმ თემაზე, რომელიც მას ყველაზე მეტად აინტერესებს, მაგრამ თავისუფალი პრესა მოქმედებს დამოუკიდებლად“, - აღნიშნავს ასოციაცია და დასძენს, რომ მიესალმებოდა პრეზიდენტის პრესკონფერენციებზე მეტი კითხვის დასმის შესაძლებლობას. ასევე ნახეთ იტალიაში G7-ის სამიტი მიმდინარეობს. უკრაინის დახმარება შეხვედრის მთავარი საკითხია ...