შვეიცარიაში მიმდინარე სამიტმა, რომელშიც ათეულობით ქვეყნის წარმომადგენელი, ასევე ორგანიზაცია მონაწილეობს, მუშაობის დასასრულს უნდა მიიღოს კომუნიკე, რომლის ტექსტის პროექტი გამოაქვეყნა სააგენტო Reuters-მა. კომუნიკეს ტექსტზე მუშაობა გრძელდება, მაგრამ ის არსებითად არ შეიცვლება. უკრაინის საგარეო საქმეთა მინისტრმა, დმიტრო კულებამ განაცხადა, რომ კომუნიკეში გათვალისწინებული იქნა კიევის პოზიცია. მისივე თქმით, ორდღიან სამიტის დროს არ განხილულა ალტერნატიული სამშვიდობო გეგმები. 15-16 ივნისს შვეიცარიის მთის კურორტ ბიურგენშტოკში მიმდინარე სამიტის კომუნიკეს პროექტში ნათქვამია, რომ რუსეთის ომი უკრაინის წინააღმდეგ კვლავაც იწვევს ფართომასშტაბიან ნგრევას, მოაქვს ტანჯვა და საფრთხეს უქმნის მსოფლიოს ბევრ რეგიონს. სამიტის მონაწილეები იხსენებენ გაეროს გენერალური ასამბლეის რეზოლუციებს, რომელმაც დაგმეს რუსეთის აგრესია. კომუნიკეზე ხელის მომწერი ქვეყნები ადასტურებენ თავიანთ ერთგულებას ნებისმიერი სახელმწიფოს, მათ შორის უკრაინის, სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის დაცვის პრინციპებისადმი. სამიტის მონაწილეები თანხმდებიან რამდენიმე ასპექტში: პირველ რიგში, ეს არის ბირთვული ენერგიის გამოყენების სფეროში უსაფრთხოების უზრუნველყოფის აუცილებლობა. ეს ეხება ზაპოროჟიეს ატომურ ელექტროსადგურს, რომელიც ატომური ენერგეტიკის საერთაშორისო სააგენტოს (IAEA) მოთხოვნების შესაბამისად და მისი ზედამხედველობის ქვეშ უნდა მუშაობდეს. კომუნიკეს ავტორები თვლიან, რომ გლობალური სასურსათო უსაფრთხოების შესანარჩუნებლად აუცილებელია შავ და აზოვის ზღვებში კომერციული გადაზიდვების უსაფრთხოების გარანტია. სავაჭრო გემებზე და სამოქალაქო სავაჭრო პორტებზე თავდასხმები მიუღებელია და სასურსათო უსაფრთხოება არ უნდა იქნას გამოყენებული სამხედრო მიზნებისთვის. მესამე, ყველა სამხედრო ტყვე უნდა გათავისუფლდეს „ყველა ყველაზე“ გაცვლის პრინციპით. ყველა დეპორტირებული ან უკანონოდ დევნილი უკრაინელი ბავშვი და ზრდასრული მშვიდობიანი მოქალაქე უნდა დაბრუნდეს შინ. კომუნიკეში აღნიშნულია, რომ ხელმომწერი სახელმწიფოები და ორგანიზაციები მზად არიან მომავალშიც გაატარონ კონკრეტული ძალისხმევა ამ მიზნების მისაღწევად. მშვიდობის სამიტში ასამდე ქვეყანა მიიღებს მონაწილეობას, მათგან 57 უმაღლეს - პრეზიდენტებისა და პრემიერ-მინისტრების - დონეზეა წარმოდგენილი, კიდევ 29 ქვეყანა მინისტრების - ძირითადად საგარეო უწყებების ხელმძღვანელების - დონეზე. შეხვედრაში მონაწილეობს საქართველოს პრეზიდენტი, სალომე ზურაბიშვილი, რომელმაც შეხვედრის მუშაობის პირველ დღეს წარმოთქვა სიტყვა და გამართა შეხვედრები. 6 ქვეყანა ელჩებს გააგზავნის: ინდონეზია, ისრაელი, არაბთა გაერთიანებული საამიროები, სამხრეთი აფრიკა, ფილიპინები და ბრაზილია. ბრაზილია და ვატიკანი დამკვირ...