„დროამ“ და „გირჩი - მეტი თავისუფლებამ“ მომდევნო, 2024 წლის საპარლამენტო არჩევნებისთვის გაერთიანება შექმნეს. „დღეს გადამწყვეტი ბრძოლა არის პოლიტიკურ სივრცეში. ამ ბრძოლაში ყველა უნდა ვიყოთ გაერთიანებული, რათა საქართველო დავაბრუნოთ ევროპული და ევროატლანტიკური ინტეგრაციის კურსზე, საქართველოში შეიცვალოს ხელისუფლება 26 ოქტომბრის არჩევნების გზით, საქართველომ შეძლოს იმ რეფორმების განხორციელება, რომელიც მოამზადებს ჩვენს ქვეყანას ვადამდელი არჩევნებისთვის და აუცილებლად დააბრუნებს ევროპული ინტეგრაციის კურსზე“, - თქვა ალექსი პეტრიაშვილმა. ალექსი პეტრიაშვილი 2012 წლის საპარლამენტო არჩევნებში „ნაციონალური მოძრაობის“ დამარცხებისა და ხელისუფლებაში "ქართული ოცნების" მოსვლის შემდეგ, რამდენიმე კვირის განმავლობაში იყო საქართველოს პარლამენტის წევრი, შემდეგ კი დაინიშნა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრად. მან სახელმწიფო მინისტრის პოსტი დატოვა 2014 წლის ნოემბერში, როცა პრემიერ-მინისტრმა თანამდებობიდან გადააყენა მისი თანაგუნდელი, თავდაცვის მინისტრი ირაკლი ალასანია. პეტრიაშვილმა მაშინ განაცხადა, რომ უმნიშვნელოვანესი ვიზიტით მყოფი თავდაცვის მინისტრის გადაყენება ქვეყნის ევროინტეგრაციის კურსს ზიანს აყენებდა. ალექსი პეტრიაშვილი ბოლო პერიოდის განმავლობაში უფროს მკვლევრად მუშაობდა „რონდელის ფონდში“. ამ ორგანიზაციასთან პარტნიორობით რადიო თავისუფლების „დილის საუბრების“ მსმენელი და მაყურებელი ისმენდა და უყურებდა ერთობლივ პროექტს, „რონდელის მსოფლიო რადარს“, რომლის თანაწამყვანიც ალექსი პეტრიაშვილი იყო. ...