18 ივნისს, გამთენიისას, აფეთქებები იყო რუსეთის როსტოვის ოლქის ქალაქ აზოვის რაიონში. ადგილობრივი ტელეგრამ-არხები დრონებით დარტყმის შედეგად გამოწვეული, სულ მცირე, ხუთი აფეთქების შესახებ იუწყებოდნენ. რეგიონის გუბერნატორ ვასილი გოლუბევის მიერ ტელეგრამით გავრცელებული ინფორმაციით, უპილოტო საფრენი აპარატებით შეტევის შედეგად ხანძარი გაუჩნდა ნავთობპროდუქტების რეზერვუარებს. გოლუბევის წინასწარი მონაცემებით, მსხვერპლი არ არის. კრემლის მიერ კონტროლირებული სააგენტო „ტასი“ რუსეთის საგანგებო სიტუაციების სამინისტროს პრესსამსახურზე დაყრდნობით წერს, რომ ხანძრის ფართობი 5 000 მ³-ია. ცეცხლის ჩასაქრობად სახანძრო მატარებელსაც იყენებენ. ერთ-ერთი ადგილობრივი ტელეგრამ-არხის ცნობით, აზოვის რაიონში იწვის მეთანოლის მწარმოებელი ქარხანა. როსტოვის ოლქი რუსეთის იმ რეგიონებს შორისაა, რომლებსაც უკრაინის მხრიდან უპილოტო საფრენი აპარატებით ხშირად უტევენ. მხოლოდ 14 ივნისს რუსეთის თავდაცვის სამინისტრო ირწმუნებოდა, რომ როსტოვის ოლქში 70 დრონი მოიგერიეს. ასევე ნახეთ რუსეთში დრონებით შეუტიეს ნავთობის კიდევ ერთ ბაზას რუსეთის სხვადასხვა რეგიონზე დრონებით შეტევა, პრაქტიკულად, ყოველდღე ხდება. სამიზნეებს შორისაა სამხედრო და სამრეწველო ობიექტები, მათ შორის ნავთობგადამამუშავებელი ქარხნები. ყოველ ჯერზე, რუსეთი უკრაინას ადანაშაულებს „ტერორისტულ შეტევებში". უკრაინას, რომელიც ორ წელზე მეტია რუსეთის სამხედრო აგრესიას ებრძვის, კანონიერ სამიზნედ აქვს გამოცხადებული სამხედრო ობიექტები და საწარმოები, რომლებიც რუსეთის არმიის მომარაგებაზე მუშაობენ. ასევე ნახეთ უკრაინის სამხედრო დაზვერვა ადასტურებს დრონებით შეტევას ლიპეცკის მეტალურგიულ კომბინატზე ...