რუსეთი "მაღალ შეფასებას აძლევს" ჩრდილოეთ კორეის “მტკიცე მხარდაჭერას რუსეთის სპეციალური სამხედრო ოპერაციის მიმდინარეობის დროს", - წერს რუსეთის პრეზიდენტი ვლადიმირ პუტინი ჩრდილოეთ კორეის გამოცემა “ნოდონ სინმუმში”, ფხენიანში მისი ვიზიტის წინ გამოქვეყნებულ სტატიაში. რუსეთი სპეციალურ სამხედრო ოპერაციას უწოდებს უკრაინის წინააღმდეგ ორი წლის წინ გაჩაღებულ ფართომასშტაბიან ომს, რომელსაც უკრაინის ბევრი ქალაქისა და სოფლის ნგრევა და ათასობით სამხედრო და სამოქალაქო პირის დაღუპვა მოჰყვა. სტატიის ტექსტი რუსულ ენაზე კრემლის ვებგვერდზეა გამოქვეყნებული. მისი სახელწოდებაა "რუსეთი და კორეის დემოკრატიული რესპუბლიკა: მეგობრობისა და თანამშრომლობის ტრადიციები წლების განმავლობაში". პუტინი, სხვა საკითხებთან ერთად, სტატიაში ხაზს უსვამს მეორე მსოფლიო ომის შემდეგ ჩრდილოეთ კორეაში დამყარებული კომუნისტური რეჟიმის განმტკიცებაში სსრკ-ის მიერ გაღებულ დახმარებას. "1950-1953 წლების სამამულო განმათავისუფლებელი ომის რთულ პერიოდში, საბჭოთა კავშირმა ასევე გაუწოდა დახმარების ხელი კორეის სახალხო დემოკრატიული რესპუბლიკის ხალხს, მხარი დაუჭირა დამოუკიდებლობისთვის ბრძოლაში", - წერს პუტინი. პუტინი სტატიაში ჩრდილოეთ კორეის ლიდერ კიმ ჩენ ინს უწოდებს კორეის „გამოჩენილი სახელმწიფო ლიდერების“ კურსის გამგრძელებელს და აკრიტიკებს აშშ-ს, რომელიც რუსეთის ლიდერის აზრით, ცდილობს მსოფლიოს თავს მოახვიოს „გლობალური ნეოკოლონიალური დიქტატურა“. 18 ივნისს, გვიან საღამოს, ვლადიმირ პუტინი ორდღიანი ვიზიტით ჩადის ფხენიანში, სადაც მიიწვია ქვეყნის მმართველმა კიმ ჩენ ინმა. პუტინის ვიზიტისას, სხვა საკითხებს შორის ისაუბრებენ სამხედრო თანამშრომლობის განვითარებაზე. ამჟამინდელი სტუმრობა 24 წლის მანძილზე პუტინის პირველი ვიზიტია კომუნისტურ კორეაში. მისი შეხვედრები ფხენიანის ხელმძღვანელობასთან რუსეთში იმართებოდა. პუტინი ჩრდილოეთ კორეიდან ვიეტნამში გაემგზავრება. მას თან ახლავს საგარეო საქმეთა მინისტრი სერგეი ლავროვი და თავდაცვის მინისტრი ანდრეი ბელოუსოვი. ასევე ნახეთ პუტინი ფხენიანში ჩადის, რუსეთის ფლოტი წყნარ ოკეანეში მანევრებს იწყებს ასევე ნახეთ ჩრდილოეთმა კორეამ რუსეთს 5 მილიონი საარტილერიო ჭურვი გადასცა - სეული ...